Shillong, Jymmang 04
Ka jingshah tuh bad shah prong jong ki dukan bad ki ïing briew ka dang ïai bteng na kawei ka sngi sha kawei pat, ha kaba ki runar ki la ïoh ban khung ei da ki lak tyngka bad kumjuh ruh ki mar ki mata.
Katkum ka khubor kaba la ïoh na ki pulit la ong ba u Anckur Chokhani u la ujor ba ha ka miet jong ka 29 tarik mynshem bnai, ki runar bym lah ban ithuh, ki la prong tuh ïa ka dukan ‘showroom’ ka jong u, kaba don ha Keating Road, Shillong bad ban tuh ïa ka pisa kaba long haduh T.3 lak.
Ha kawei pat ka khubor, u Anuj Nandy u la ujor sha ki pulit ba ha ka 30 tarik mynshem bnai, ki runar bym lah ban ithuh, ki la prong tuh shapoh ka ïing sah ka jong u, kaba don ha Bivar Road, Shillong bad ban tuh ïa ki ksiar kiba shongdor haduh kumba T.5.2 lak bad ruh ban tuh ïa ka pisa kaba long T.30,000/-.
Ha kawei pat ka khubor, u Nabendu Deb u la ujor ba ha ka 29 tarik mynshem bnai, ki runar bym lah ban ithuh, ki la prong tuh shapoh ka ïing sah ka jong u, kaba don ha Harisava, Shillong bad ban tuh ïa kawei ka mobile phone, ar tylli ki ksiar ba shongdor kumba T.35,000/- bad ka pisa kaba long T.9 hajar.
Katba na ka liang jong u Smailstar D Sangma u la ai ka jingujor ba ha ka 30 tarik mynshem bnai, ha ka por kumba 5 baje janmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AE-5421, kaba la pynïeng harud surok kaba don pyrshah ka ophis treikam jong ka Directorate of Printing & Stationery, Shillong.
Ha kawei pat ka khubor, u Edilbert Lating u la ai ka jingujor ba ha ka 26 tarik mynshem bnai ha ka por mynsngi, u paralok jong u ïa uba la tip kyrteng kum u Daniel na Laitkor, Shillong, u la shim ïa ka arshaka ka jong u, kaba don ïa u registration number ML05-AD-4406 na Civil Hospital, Shillong bad haduh mynta u khlem wan pynphai shuh.
