Shillong, Jylliew 05
Ka ophis jong u Sub-Divisional Officer (C), Pynursla Civil Sub-Division ka la pyntip sha baroh ki nongleit nongwan bad ki paidbah ba ïa ka shi lynter jong ka surok hapdeng ka Laitlyngkot-Lyngkyrdem yn sa khang shipor ïa baroh ki kali ba leit ba wan naduh ka 9 tarik Jylliew, 2025 haduh ka 13 tarik Jylliew, 2025.
Ha ka kyrwoh khubor ba la pyllait, la ong ba ka jingkhang shipor ïa kane ka surok ka long kaba donkam na ka bynta ban pynïaid shakhmat ïa ka kam shna surok.
La pyntip ba ka por ban khang ïa ka surok ha kine ki sngi ba la pyntip, kata kan long 8 baje mynstep haduh ka 11 baje mynstep bad nangta sa pynbud biang naduh ka por 1 baje mynsngi haduh ka por 4 baje janmiet; kata kaba mut ka jingkhang kan long 3 kynta ha ka por mynstep bad 3 kynta ha ka por janmiet.
Ka ophis ka la pyntip ba ka jingkhang shipor ka long kaba donkam na ka bynta ban pynthikna ïa ka jingïaid beit ïaid ryntih jong ka jingshna surok bad khamtam eh, na ka daw ka jingdon jong ki bynta ba syier ha shi lynter ka surok kiba donkam ban pynkhuid bad pynbha.
La kyrpad ïa baroh ki nongleit nongwan ba kin ai ïa ka jingïatreilang bad ban khreh biang por lypa ïa la ka jingleit jingwan jong ki ha kitei ki sngi bad ki por ba la buh na ka bynta ka jingmyntoi lang jong uba bun bad ka jingpyndep biang por ïa ka jingshna surok.
