Jowai, Jylliew 05
Ka bor synshar jong ka West Jaiñtia Hills District ka la thaw ïa ka komiti ba saw ngut ki dkhot ban tohkit bniah halor ka jingïap jong ka Kong Pynche Bareh kaba armet na Jalaphet, East Jaiñtia Hills kaba la khlad noh ha Maternity and Child Hospital (MCH), Jowai ha ka miet 4 tarik Jylliew.
U Deputy Commissioner (DC) ka West Jaiñtia Hills u Abhinav Kumar Singh, IAS, u la ong ïa kane haba kren sha ki lad pathai khubor ha ka 5 tarik u Jylliew. “Ha ka jingshisha, kane ka jingïap ka longkmie ka dei ka jingjia kaba sngewsih,” la ong u DC.
Haba ïathuh ïa ka kaiphod kaba ïohlum na ka Superintendent MCH, u DC u la ïathuh ba kane ka longkmie la sumar nyngkong eh ha Sutnga CHC ha ka 2 tarik u Jylliew ryngkat ka jingujor ba ka mih snam. “Ha ka 3 tarik, kata ka Sngi Ba-ar, ha ka por 12:42 baje nohphai sngi la pdiang ïa ka ha MCH Jowai katkum ka jingai jingmut na ka Sutnga CHC,” u la ong bad bynrap ba namar ka jingshitom, kam lah ban bam ïa ki jingbam.
“Ha ka 4 tarik u Jylliew, u doktor ba dei peit u la jurip ïa ka jinglong jingman jong ka. Ha ka por 2 baje nohphai sngi, ka jinglong jingman jong ka, ka la biang bha. Ha ka por 5:30 janmiet, ka la ud suh ha ki bynta ka kpoh bad la pynkynriah noh ïa ka sha ka Higher Dependency Unit kaba don hapoh ka jingpeit u medical officer,” la ong shuh shuh u DC.
“Ha ka por 6:20 janmiet biang, la rekod biang ïa ka jinglong jingman ka jingshitom kane ka longkmie. Ha ka por 8:10 janmiet, ka jingshitom jong ka, ka la sdang ban jur wat hadien ka jingsumar bad khmih bniah da u medical officer bad ha ka por 9:15 mynmiet, la pynbna ba ka la khlad noh”, u la ong.
U la pyntip ba la thaw ïa ka ‘internal committee’ da ka Superintendent ka MCH ban peit ïa kane ka kam bad ban ai ïa ka kaiphod. Ka kynhun kaba kyrpang na ka Directorate of Health Services, kaba la khlieh da u Joint Director ruh ki la wan jngoh ïa kane ka hospital bad sdang ïa la ka jong ka kam wad bniah, da kaba lum jingtip na ki ophisar ka koit ka khiah, ki doktor kynthei, ki doktor khynnah bad kiwei kiwei kiba ïadon bynta.
“Ha ka kyrdan jong ngi na ka bor synshar district, ban don ka jingtohkit kaba khlem shah liang, ngi la thung ïaka ADC ka Kong B Blah, ban khlieh ïa ka komiti ka ban peit bniah bad wad bniah ïa kiei ki daw ba wan jia kane ka jingjia,” ong u DC.
U la ong ruh ba ki la kyntu ïa ka East Jaiñtia Hills ban thung ïa doctor Gynaecologist bad Pediatrician ban kynthup ha ka komiti ba saw ngut.
“La bthah ïa ka komiti ban aiti ïa ka kaiphod hapoh ka Sngi Nyngkong. “Halor ka kaiphod, yn sa leh ïa kaba donkam,” la ong u DC.
U la ong shuh shuh, “Ynda la dep kane ka jingtohkit, ngin sa khot ïa ka jingïalang ha kaba ïadei bad ka jinglap jingshem ka komiti kiba don ha MCH hospital ne ha kaba ïadei bad kiwei pat ki jaka sumar ruh bad halor kata, yn sa buh ïa ka jingai jingmut jong ngi.”
