Jowai, Jylliew 05
Ka Jaiñtia Student’s Union (JSU) bad Khasi Student’s Union (KSU) West Jaiñtia Hills District Unit ki la dawa na ka Sorkar ban pynshitom ïa ki doktor, nos bad baroh ki nongtrei kiba don ha ka kam ha ka por ba khlad ka longkmie armet ha MCH Hospital Jowai ha ka miet 4 tarik Jylliew.
Kane ka jingdawa ka la long hadien ba ki bahaïing ka longkmie armet ki la kynnoh ba ka jngkhlad jong ka bad i khun hapoh kpoh ka dei namar ka jingkheiñ sting ki doktor bad nos ban pyndep ïa ka kamram kaba dei ban leh.
Ka JSU bad ka KSU mar sien ïoh jingtip halor ka jingkhlad noh ka longkmie armet ha hospital MCH Hospital ha Panaliar, Jowai, ha katei hi ka miet ki la leit mar-mar sha katei ka hospital ban ïakynduh ïa ki khlieh nongpynïaid jong ka jaka sumar.
U nongïalam ka JSU u samla Nielkee Mukhim u la ong ba lada kane ka hospital Sorkar kam lah ban shimkhia ïa kino-kino ki nongpang kiba la pdiang ban sumar, sngewbha wat nym pdiang nongpang namar ka pynsngewsih haba jia kum kine ki jingjia kat haduh ban duh noh ïa ar ki mynsiem tang namar ka jingkheiñ sting ki doktor bad ki nos katkum ka jingkynnoh ki bahaïing.
Katba u General Secretary ka KSU West Jaiñtia Hills District Unit u Leningrad Tariang, ula ong ba ka KSU kan ïai buddien halor kane ka jingjia, namar kamdei ka sein kaba nyngkong ba kum kine ki jingjia kin jia hapoh kane ka hospital.
Halor kane ka jingjia na ka liang ka seng Kur Bareh, East Jaiñtia Hills District hapoh ka jingïalam jong u President Ma Finelyness Bareh ka la phah jingthoh sha ka Myntri ka tnat ka koit ka khiah ban dawa tohkit halor kane ka jingjia.
