Shillong, Jylliew 05
Ka jingmih kynsan jong u General Secretary ka United Democratic Party (UDP), Dr. Jemino Mawthoh na ka seng ka la pynkyndit shikatdei ïa ki nongïalam, ki dkhot bad ki nongkitkam ka seng namar ba u Dr. Jemino u dei u nongïalam uba radbah bad uba la don slem bha ha ka seng.
Hadien ka jingmih noh jong u Dr. Jemino, na ka liang ka UDP ha ka 5 tarik Jylliew, 2025, ka la pynlong ïa ka jingïalang hapoh ka ophis treikam kaba don mar pyrshah bad ka Shillong College ban ïakren sani bha halor kane ka mat nalor kiwei-kiwei pat ki mat jingïakren.
Haba kren sha ki lad pathai khubor hadien ba la dep ka jingïalang, u Bah Titostarwell Chyne, Working President, u la ong ba wat la ka long kaba sngewsih hynrei hadien ka jingïamir jingmut, ka seng ka la shim ïa ka rai ban pdiang ïa ka shithi iehnoh kam jong u Dr. Jemino na ka seng bad ban pynpaw ba kam dei na kano-kano ka daw hynrei ka dei hi ka rai shimet jong u.
“Hadien ba ngi la ïatai bha na kiba bun ki liang, ngi la sngewthuh ïa ka jingpynshai na ka liang u President uba la ïakynduh markhmat bad u Bah Jemino ha ka jingïalang, ngi la rai ban pdiang ïa ka shithi iehnoh kam jong u bad ngin sa pyntip sha ka jingïalang jong ka CEC ka ban sa long ha ka 27 tarik mynta u bnai,” ong u Bah Titos.
U Bah Titos u la ong, kam don satia kano-kano ka jingbym ïasngewthuh jingmut ne ka jingbym hun ha ka jingtreikam hapoh ka seng ka ban pynlong ïa u Dr. Jemino ban iehnoh kam.
Nalor kata, u la ong ruh ba haba ïadei bad ka shuki General Secretary ki la don lypa hynriew ngut ki Secretary bad kumta ka seng kan sa jied uwei napdeng jong ki ban shimti shipor ïa kane ka kam.
“Ngi la aibor ïa u President ban jied uwei u Secretary napdeng jong kine hynriew ngut ban shimti shipor na ka bynta ban pynïaid ïa ki kam jong ka seng,” bynrap u Bah Titos.
U Bah Titos u la bynrap da kaba ong ba ka jingiehnoh kam jong u Dr. Jemino ka dei ka jingduhnong kaba khraw ïa ka seng namar ba u Dr. Jemino u la don la slem bha bad ka seng.
