Shillong, Jylliew 05
Katba dang muja bad sngewbha ha ka jingïadih kyiad kyndit-kynsan ka la mih ka jingïakajia bad ka jingshah thombor jong uwei da ka tari ha uwei pat.
Katkum ka khubor kaba la ïoh na ki pulit la ong ba ha ka janmiet jong ka 3 tarik mynta u bnai, ka la mih ka jingïashoh hapdeng u Johnlidar Khongji (32 snem) bad u Khrawborlang Khongdup (30 snem), kaba la mih katba ki dang ïashong dih kyiad lang ryngkat ha ka ïingsah jong u Khrawborlang Khongdup ha ka shnong Nongeitniang ha East Khasi Hills.
Ka khubor na ki pulit ka la ïathuh ba ha kane ka jingmih ka jingïashoh, u Johnlidar Khongji u la thombor ïa u Khrawborlang Khongdup da ka tari. Hynrei la ong ba na ka liang jong ki dkhot ka VDP bad ki ‘riew rangbah jong ka shnong hadien ba ki la ïohsngew ïa kane, ki la leit ban tuklar noh ïa kane ka kam.
Ha kaba ïadei bad kane ka jingjia, la pyntip noh sha ki pulit ha kaba ki la ïalam noh ïa kitei ar ngut sha PHC ha Pongtung bad ha kaba u Khrawborlang Khongdup u la hap ban shah bat noh ha hospital na ka bynta ban ïoh ka jingsumar. Kham hadien na ka liang jong ki pulit, ki la rah noh ïa u Johnlidar Khongji.
Ha kawei pat ka jingjia, la ong ba u Abdul Wahab Sheikh u la ai ka jingujor ba ha ka janmiet jong ka 3 tarik mynta u bnai, ha ka por kumba 4.45 eiei, uwei u briew ba la tip kyrteng kum u Chottu ryngkat bad san ngut ki paralok jong u, ki la thombor ïa u da u nar rod bad ruh ban knieh jubor ïa ka pisa kaba T.5,000, kaba la jia ha ka shnong Kasaripara kaba hap hapoh ka thanat Hallidayganj ha West Garo Hills.
