Jowai, Jylliew 05
Kawei ka longkmie kaba armet ka la khlad noh bad i khunlung ha kpoh ha hospital Maternal and Child Health (MCH) Hospital ha Panaliar, Jowai ha ka miet 4 tarik Jylliew ha kaba na ka liang ki bahaïing ki la kynnoh ba kane ka jia namar ba ka slem ban ïoh ïa ka jingsumar.
Kane ka longkmie kadei ka Kong Pynche Bareh, 37 snem ka rta, na ka shnong Jalaphet ha East Jaiñtia Hills District. Kane ka longkmie dei kaba la phah ne refer na Sutnga CHC sha MCH Jowai ban kan ïoh ïa ka jingsumar kyrkieh ban kha ïa i khunlung.
La ïathuh ba ka la poi ha kane ka hospital ha ka 3 tarik Jylliew da ka jingthmu ban kha ïa i khun iba phra, hynrei ka la ngat noh ha kane ka apot kaba sngewsih.
Ka Kong Beautiful Bareh kaba dei shipara bad ka kmie jong ka Kong Pynche Bareh, ka la kynnoh ba ka jingkhlad jong ka Kong Pynche Bareh, ka dei namar ka jingbym wan jong ki doktor bad ki nos ban sumar ïa ka ha ka por kaba biang, bad ruh ka jingkheiñ sting jong ki doktor bad nos jong katei ka hospital.
Haba ïathuh halor kane ka jingjia, ka la ong ba ïa ka Kong Pynche la pynkit nyngkong sha Sutnga CHC ha ka 2 tarik Jylliew hadien ba ka mad ïa ka jingphlei snam, bad ki doktor ka CHC ki la phah noh ïa ka sha MCH Jowai ban ïoh jingsumar kaba kyrkieh.
Ki la poi ha MCH Jowai ha ka por 1.00 baje mynsngi jong ka 3 tarik Jylliew bad ha ka step 4 tarik ki doktor ki la bthah ïa ka Kong Pynche ban ym bam ym dih shuh namar ba ka la dei ka por kha bad ban sumar noh ïa ka.
Hynrei hapdeng ka jingshah thngan, ki bahaïing ki la kynnoh ba na ka liang ki doktor ki khlem wan peit wan jngoh ïa ka wat haba ki la pyrshang bun bun sien ban leit kylli na ki nos, hato kin sumar ne ym sumar khnang ban ai jingbam namar ba ka la sdang kem tlot.
Pynban ha ka por nohphai sngi, ki nos ki pyntip ba kam dei ka sngi ban sumar ïa ka, kumta ki la bthah ïa ki bahaïing ban ai bam ai dih noh ïa ka bad ba ka Kong Pynche ka la ïoh ban bam ban dih ha ka por 1.00 baje mynsngi.
Dei hadien katto katne por, kata ha ka 5 baje janmiet ka Kong Pynche ka la shitom na ka jingphlei snam bad haba ki pyrshang ban pan jingïarap na ki nos hynrei ki nos ki la mai ki la tim pynban ïa ka, la kynnoh ki bahaïing.
Hadien kane ka jingjia phlei snam, ki bahaïing ki ïathuh ba u doktor u la wan ban peit ïa katei ka longkmie bad phah soi kot ban phah sumar noh sha kiwei ki jaka sumar hynrei la lap ba la dier ka por bad kane ka longkmie ka la khlad noh ha ka por 9.30 baje janmiet.
Haba ïoh ban ïakren bad u doktor katei ka hospital u la ong, ka jinglong jingman ka koit ka khiah jong katei ka longkmie armet ka long kaba biang bad ngi pyrkhat ba kan kha suk kha saiñ, hynrei ha ka por 8.30 janmiet ka jinglong jingman ka koit ka khiah ka la sdang ban kylla.
U la ong ruh ba ka la kha bun ngut ki khun, bad ka Scanning jong ka, ka pyni ba don 3-centimetre ka um bad ka sngi ban kha ka dei ha ka 12 tarik mynta u bnai. U la ong ba ki doktor ki la pyrshang ban ai ka ‘Alamin Drip’ ar bilor da ka jingthmu ban don khyndiat ka um bad ba kan lah hi ban suh kha.
Halor kane ka jingjia, ki bahaïing ki la mudui da ka ejahar ha thanat Jowai ha ka 5 tarik Jylliew pyrshah ïa ki doktor bad nos jong katei ka hospital Sorkar halor ka jingkynnoh leh torti bad jingbym ai ka jingsumar kaba biang bad dei por ïa ka Kong Pynche katba ka dang im ha kane ka sla pyrthei.
Ki pulit ka district hadien ba ki la ïohpdiang ïa ka jingmudui mar-mar ki la leit sha MCH Hospital ban shimti ïa ka met jong ka Kong Pynche na ka bynta ban pynkit sha Jowai Civil Hospital, Ialong ban leh ïa ka Post Mortem.
