Shillong, Jylliew 05
Hadien katto-katne sngi ka jingiehnoh kam u Dr. Jemino Mawthoh na ka United Democratic Party (UDP) kum General Secretary, ka la mih ka jingong na u Bah Batskhem Myrboh, nongaiktien ka Voice of the People Party (VPP) da kaba kynnoh ba ka UDP ka dei ka seng kaba ‘shim kabu’, ‘ka ban sa hiar’ bad ‘ka ban ym long eiei shuh ha u snem 2028’, ka la pynlong ïa u Bah Titostarwell Chyne, Working President ka UDP ban pynphai nia halor kane bad pynpaw ba u dap da ka jingsngew lyngngoh ban ïohi ba u Bah Batskhem Myrboh un dei uba nyngkong eh ban kren eiei halor kane ka jingiehnoh kam jong u Dr. Jemino Mawthoh.
Haba kren sha ki lad pathai khubor ha ka nohphai sngi ka 5 tarik Jylliew, 2025, u Bah Titostarwell u la ong, ka UDP kam ju tuklar ïa ka kam seng jong ki bad kumta kane ka jingkren jong u Bah Batskhem Myrboh ka long ka bym lah ban pdiang satia.
“Nga lyngngoh kaei kaba la pynlong ïa u Bah Batskhem ban kren eiei nyngkong eh halor kata ka jingiehnoh kam jong u Dr. Jemino. Balei pat ban da kynnoh ïa ka seng jong ngi? Ngi, ngim ju don jingkynnoh eiei ïa ka VPP la ki mih ne ki rung mano-mano ruh, kam dei ka kamram jong ngi ba ngin kren eiei halor ka seng jong kiwei,” ong u Bah Titos.
Nalor kata, u la buh jingkylli ba u Bah Batskhem u la dei u nongïathuh lypa naduh mynno bad u dei kum u nongaiktien ne u nongïathuh lypa jong ka VPP ban ong ba ka UDP kan sa hiar noh.
U Bah Titos u la ong, kum u rangbah u dei ban kiar ïa ka ban kren kum ïa kine ki kyntien namarba kum ki nongtrei paidbah bad ki nongïalam jong ki seng saiñ pyrthei ki don la ka jong ka bynta ban trei bad ban burom markylliang.
Shuh-shuh, u Bah Titos u la ong, ka UDP kam dei ka seng kaba dang mynnin-mynne hynrei ka dei ka seng ba la suit la shor naduh ka por jong ka All Party Hill Leaders Conference (APHLC) bad kaba la sei shibun ki nongïalam bad ki nongmihkhmat.
“Wat u nongïalam jong ka VPP ruh u dei u briew jong ka UDP. Kam mut ba tang haba don ba mih na ka seng, ka seng kan jah noh, ki don shibun kiba la mih na ka UDP ym dei tang u Bah Jemino bad ki nongïalam ruh ki wan bad ki leit hynrei ka seng kan neh”, bynrap u Bah Titos.
