Shillong, Jylliew 05
Ka ïingbishar ka Kong B Khriam, Special Judge (POSCO) ka East Jaiñtia Hills, ka la hukum ban set patok haduh 25 snem ryngkat bad ka daiñ kuna ïa uwei u runar uba la donkti ban leh be-ijot ïa kawei ka khynnah ha ki thaiñ Khliehriat.
Une u runar uba la shah pynngat ha ka kyndon 6(1)jong ka POCSO Act u dei ba la tip kyrteng kum u Boti Surong bad ha kaba ka ïingbishar ka la hukum ban set patok 25 snem lem bad ka kuna kaba T.30,000 bad lada um lah siew un hap shong patok sa 2 bnai.
Kane ka mukotduma ka dei kaba la register hapoh ka Khlieh Women Police Station Case No. 32(07)2023 bad la tohkit ïa ka da ka WPSI L Siangshai.
Kumjuh, ka ïingbishar ka Kong B Khriam ka District & Session Judge ka la hukum ban set patok 10 snem ïa ar ngut ki runar ba donkti ha ka kam leh beijot, kata u Ioobha Phawa bad u Indri Dkhar.
Kine ar ngut ki la shah tiañ bishar katkum ka Khliehriat PS case no. 43(06)2023 ïa kaba la pynngat hapoh ka kyndon 363/376/34 IPC.
Ka ïingbishar hadien ka jingbishar kaba bniah ka la pynngat ïa kine baroh ar ngut hapoh ka kyndon 376 (2)(g)/34 IPC bad hukum ban set patok 10 snem ïa ki lem bad ka kuna mar T.5,000.
