Shillong, Jylliew 05
U Bah Paul Lyngdoh uba dei u Myntri ba khmih ïa ka tnat Jngohkai ka Jylla u la ther tyngeh ïa ka rukom ai khubor jong ki ‘National Media’ ne ki lad pathai khubor ka Ri, ha kaba ka la paw shai ba kim pat sngewthuh satia ïa ka Meghalaya hynrei kiba don ka jingthmu bad thrang ban ïaleh ban pynbudnam ïa ka Meghalaya bad ruh ïa ki nongshong shnong ka jylla.
Haba kren sha ki lad pathai khubor ha ka Sngi Palei, u Bah Paul haba pynrem jur ïa ka rukom pynmih bad ai khubor ka bym shisha jong ki National Media ha kaba ïadei bad ka jingjah jong ki shi kurim na Indore, u la ong kane kam dei kaba thymmai hynrei kine ki lad pathai khubor ka Ri manla ka por hi ki dei kiba leh shiliang pyrshah ïa ka thaiñ shatei lam-mihngi jong ka ri bad ki ïohi ba ka jingkiew jong ka Meghalaya ha ka kam jngohkai ka dei kaba buh ïa ki ha ka jingma.
U Bah Paul u la ong, ba ka jingshah pynïap ba dang shen u nong Indore u Raja Raghuvanshi ka dei ka jingjia kaba jia shisien lano eh. Kumta kane ka rukom leh ne pynmih khubor ka dei kaei-kaei kaba hap ban pynrem jur bad kaei-kaei kaba sngewkhuslai bha”.
“Ha ka jingshisha ngim pat lah ban tip kaei kaba la jia katba ym pat dep lut ka jingtohkit baroh, yn ym pat lah ban ong eiei halor kane ka kam. Kumta, nga pynrem jur ïa ka rukom leh jong ki National Media. Ka pyni ïa ka jingleh shiliang ka jong ki pyrshah ïa ka thaiñ bad khamtam ïa ka jingkiew jong ka kam jngohkai ha ka Meghalaya, ki ïohi ba ka long ka jingma,” ula ong.
Shuh shuh na ka liang jong u Bah Paul u la ong, “Ngan pynkynmaw ïa ki bad ïa ki briew jong ka Meghalaya ba ka kam jngohkai ka la ïaid da ki phew phew snem ha Sohra khlem kano-kano ka jingbit snam ha ka jinglong ka jong ka. Kam shym la don kano-kano ka rekod jong kano-kano ka jingjia jong ka jingïaumsnam ha ki snem kiba la leit bad ngi la don ïa ki mishoneri kiba nyngkong eh kiba la poi ha Sohra ha u snem 1841, ngi don ïa ka Ram Krishna Mission, kaba dei ka kynhun kaba heh tam ha ka jingbun shnat ha ka jylla, kaba don ïa ka Headquarter ha Sohra. Kumta, kane ka jingleh ka pyni ba ki duna ïa ka jingsngewthuh ïa ka Meghalaya bad ka dei ruh ka jingpynthohbria pyrshah ïa ka jylla bad ïa ki paidbah.”
