Jowai, Jylliew 22
Ka Dorbar ki Waheh Kur Ri Jaiñtia ka la rai ban dawa na u Myntri Rangbah ka Jylla ban pyndam ïa ka kyntien ‘Synteng’ bad ruh ïa ki jaidbynriew bym dei ki trai ri trai muluk ka Meghalaya na ka thup ka Schedule Tribe Order 1950.
Ïa kane ka rai, ka Dorbar ki Waheh Kur Ri Jaiñtia, ka la shim ha ka jingïalang 1st Annual General Meeting kaba la long ha Iungwalieh ka Chilliangraij ha ka 21 tarik Jylliew.
La rai ruh ban kyrpad biang ïa u CEM bad ki EM jong ka Jaiñtia Hills Autonomous District Council (JHADC) ban khot ïa ka Dorbar ki Waheh Kur Ri Jaiñtia ban shna aiñ noh ïa ki kur kiba la dep pynrung sha ka JHADC.
Ha ka jingïalang kaba la pynïaid da u President Bah K Lamsalanki Pariat, ka Dorbar ki Waheh Kur Ri Jaiñtia kala pynpaw ka jingsngewdiaw halor ka jingbym ithuh ka JHADC ïa ki Kur, ki Waheh Kur bad ki Seng Kur.
Ha kane ka sngi la pynthymmai ruh ïa ki nongkitkam na ka bynta ka samoi jong u snem 2025-2027 ha kaba la jied President ïa u Bah Khroo L Pariat, Vice President Bah Pyrkhat Shylla bad Bah Jesper Bareh, General Secretary Bah GH Bareh, Assistant General Secretary Bah Kitlang Lato, Bah Kmenlang Myrchiang bad Bah Carmel Suchiang, Treasurer Bah Abut N Muksor, Adviser Bah Erwin K Syiem Sutnga bad Bah Shell Sing Langi bad 10 ngut ki dkhot Executive Dorbar.
