Tura, Naitung 27
Ka Non Gazetted Employees Association (NGEA) ha ka Lah Sngi U Blei ka la sdang ïa ka jingïakhih shong kyllaiñ mungor ba jar-jar shabar ki ophis ka GHADC ha ka sor Tura halor ka jingbym ïoh tulop mynta la 42 bnai.
Kitei ki nongtrei kiba don hapdeng ka jingïakhih ki la dawa ban pyllait noh ïa ka tulop jong ki ka bym duna ïa ka 12 bnai khnang ban weng noh ïa ka jingïakhih ba san sngi jong ki.
Ka tulop jong ki nongtrei ka GHADC ka la sahteng mynta naduh u snem 2016. Kaei kaba la sdang tang na bynta shi bnai, suki-suki ka la nang ïaid sha ka shisnem bad tang hapoh 3 snem naduh ba sdang ka jingkyrduh pisa ha GHADC. Kumba ka long mynta, ki nongtrei ka GHADC ki dang hap ban ïoh ïa ka tulop kaba 42 bnai – kaba long ka daw jong ka jingïakhih jong ki.
Da ki spah ngut ki nongtrei ka GHADC ki la shong baroh shisngi ban pynpaw ïa ka jingbitar jong ki namar ka jingbym phai khmat mynta la palat 3.5 snem.
Katba ki jingïakhih ki la nang ïaid ha ki snem ba la leit halor ka jingdawa ban pyllait ïa ka tulop ba sahteng ki nongtrei, kaba bun ka la ïalam sha ka jingpyllait tulop kaba tang 2-3 bnai bad hadien kata ki nongtrei ki leit phai biang sha jingtrei kumba ju long pat. Hynrei mynta ka kynti, ki nongtrei ki kwah ba dei ban pyllait ïa ka tulop ka bym duna ïa ka shisnem sha ki.
“Kumba long mynta, ngi hap ban ïoh ïa ka tulop kaba 42 bnai, hynrei ngi sngewthuh ïa ka jinglong-jingman kaba ki nongïalam ki ïakynduh bad ngi kwah ba dei ban pynkhuid noh ïa ka tulop kaba tang 12 bnai ïa mynta, ban weng noh ïa ka jingïakhih. Ngin ym sangeh ïa ka jingïakhih tad haduh ba kin da mynjur ïa ki jingdawa jong ngi bad ngin bteng ïa kajuh ka jingïakhih khlem buh por haduh ba kin da sngap. Mynta ka kynti ngim shim ïa ka tulop kaba lai bnai,” ong u Brithen Sangma, President ka NGEA.
