Shillong, Naitung 08
U SP City, Bah Herbert Kharkongor u la ïathuh ba ka jingjia ïa dung tari ha Mawlai hynnin ka miet ka dei ka jingïashoh jingïadat bad ïa kulmar hapdeng ar kynhun kaba la sdang naduh ka por mynstep ha kaba ki pulit kim shym la ïoh jingtip eiei, hynrei dei mynmiet ba la pyntip sha ki pulit ba ka la don ka jingmynsaw briew ruh.
Ïa kane, u Bah Herbert u la ïathuh haba ïakren bad ki lad pathai khubor ha ka Sngi Ba-ar, ka 08 tarik u Naitung, 2025.
U Bah Herbert u la ïathuh ba ki pulit ki la pynrung mukotduma bad ka jingtohkit mynta ka dang ïaid shakhmat bad haduh mynta ki pulit kim pat ïoh kem ïa u briew uba donkti ban dung da ka tari.
Hadien ba ka jingïashoh ka dang bteng sah, na ka liang u ophisar ka Mawlai PS mar-mar u la leit sha katei ka jaka ban tem ïa ka jingkulmar bad ynda u la poi ha katei ka jaka, la lap ba ka don shisha ka jingïashoh, ha kaba uwei u samla uba kyrteng Khrawbok Khongsit, 24 snem u la mynsaw na ki bynta jong ka kti, la ong u Bah Herbert.
U la ong ba ha katei ka jingïashoh ki ïadon bun ngut namar ki don ar kynhun bad ka jingtohkit mynta ka dang ïaid ban lapdien ïa baroh kiba donkti ha kane ka kam.
“Haduh mynta ki pulit kim pat ïoh kem ïa u briew uba donkti ha kane ka kam dung tari bad kin shimkhia ïa kane ka kam ban ïaid shakhmat ban pynlong ïa ka jingtohkit khnang ban lapdien ïa u,” u la ong.
