Jowai, Naitung 08
U Symbud Myntri Rang-bah ka Jylla, Bah Sniawbhalang Dhar ha ka 8 tarik Naitung u la hiar jurip dalade sha ka shn-ong Lapangap ha West Jaiñtia Hills District hadien 15 sngi jong ka jingjia ïakynad kaba la mih hapdeng ki nongshong shnong ka Lapa-ngap bad nongshong shnong Karbi na Tahpat.
U Bah Sniawbhalang u la leit ban jurip shajan ka jaka ba mih ka jing-ïakajia hapdeng ki nongshong shnong ka Lapan-gap bad ki nongshong shnong ka Tahpat bad la synran lang ïa u da u Chief Executive Member ka JHADC Bah Thombor Shiwat, ki MDC ka JHADC, u Deputy Commissioner ka West Jaiñtia Hills District Abhinav Kumar Singh IAS, u Superintendent of Police ka West Jaiñtia Hills District Jagpal Dhanoa, u Executive Magistrate Ma GH Passah nalor kiwei kiwei.
Katei ka jingïakajia ka la mih hadien ba ki nongshong shnong Karbi ki la puh ïa ka Pynthor kaba dang hap hapoh u pud u sam ka shnong Lapangap na ka bynta ban thung ïa ki tynrai dieng. Ki nongshong shnong ka Lapangap ban ïada ïa la u pud u sam ki la mih paidbah bad jynrat naphang ïa kitei ki tynrai dieng ba la thung da ki Karbi. Hadien pat ki Karbi ki la pynjulor ïa ki pynthor kba bad thang ruh ïa ki ïing trep jong ki nongrep ka shnong Lapangap.
Hadien ka jingjurip, u Bah Sniawbhalang Dhar ha ka jingïalang paidbah, u la kyntu ïa ki nongshong shnong ha ki jaka khappud ne ki jaka ïakajia bad ka Assam ba kim dei ban shah ïalam bakla ha ki briew kiba wan nabar namar maki, ki wan bad leit hynrei dei ki nongshong shnong kiba mad pat ïa ki jingeh jingjynjar.
Haba bteng ïa ka jingkren u Bah Sniawbhalang Dhar u la ong ba ka jingïakajia khappud ka dei ka mat kaba la rim bha bad kaba la neh da ki phew snew namar ka jingbym pynbeit ryntih ïa u pud u sam ha ka por ba ïoh Jylla bad kumta ym lah ban pynbeit noh hapoh ki khyndiat sngi hynrei watla katta ruh ka Sorkar ka ïengskhem bad kut jingmut ban pynbeit noh ïa ka jingïakajia khappud.
“Nga kular hangne ban pynthikna ban wanrah ïa ka jingsngewskhem jong ki nongshong shnong bad ba kim dei ban tieng ban smiej bad na ka bynta ka jaidbynriew jong nga, nga hun ba duh thiah duh dem,” la ong u Bah Sniawbhalang da kaba bynrap ba mynta ka kam pynbeit pud kam dei shuh kum ka por mynshuwa da ka wait u sum, hynrei mynta da u khulom da ka jingthoh ryngkat ki kot sla.
Shuh shuh u Symbud Myntri Rangbah u la ong ba ka Sorkar ka la bthah ïa ki bor District jong ka West Jaiñtia Hills ban ïatreilang bad ki bor District jong ka West Karbi Anglong khnang ban pynlong ïa ka jingïalang hapdeng ki Lapangap bad ki Tahpat khnang ban wanrah ïa ka jingïasngewthuh jingmut bad ka jingwanphai ka shongsuk shongsaiñ.
U Bah Sniawbhalang Dhar u la ong ba ka jingeh kaba hakhmat duh mynta ka long ka jingbym ïoh lad ban leit rep leit riang ki nongshong shnong ka Lapangap sha ki pynthor markhap bad ka Tahpat bad kumta ka Sorkar kan thaw ki lad ki lynti ban pynbeit ïa kane.
U la kyrpad ruh ïa u Chief Executive Member jong ka JHADC ban ïakren bad u Chief Executive Member jong ka Karbi Anglong Autonomous Council khnang ba ki nongshong shnong Pnar kin ym shah pynthut ha ki nongshong shnong Karbi.
U Bah Sniawbhalang u la bthah ruh ïa u Waheh Shnong jong ka Lapangap ban pynpoi ïa ki kot ki sla jong ki jaka puta ha khappud jong ka shnong Lapangap sha u Border Magistrate WJHD u Bah GH Passah bad u Bah Passah yn pynpoi sha ka Regional Committee.
