Shillong, Naitung 08
U Myntri ba khmih ïa ka tnat Bording ka Jylla, u Abu Taher Mondal uba dei ruh Chairperson ka North Eastern Regional Power Committee (NER-PC) u la kyrpad ïa ka jingïarap song pisa na ka Ministry of Power ban kyrshan ïa ka projek transmission ha ka thaiñ shatei lam-mihngi kynthup ïa ka projek kaba dang pynwandur thymmai ba T.2270 klur.
U Mondal u la ban jur ruh ïa ka jingdonkam ban ai kyrpang ïa u 132 KV line sha ki jaka khappud ka Bangladesh ban pynjanai ïa ka jingsam bording.
Ïa kane ka jingkyrpad u la buh hakhmat u Chairperson jong ka Central Electricity Authority u Ghanshyam Prasad, uba dei ruh Chairman ka National Power Committee (NPC) ha ka jingïalang kaba 16th NPC ba dang shen ha Courtyard Marriott, Shillong.
Haba kren sha ki lad pathai khubor na ka liang jong u Myntri u la ong, “Ka Jylla ka la pynkhreh ïa kane ka transmission plan kaba la ai jingmynjur da ka CEA. Ka projek ba dang shu pynwandur thymmai kan kyntiew ïa ka jingsam bording sa 760 MVA bad kumjuh ruh ïa u lain ba 190 Ckt km, ïa kaba ka pisa ba donkam kan kot ïa ka T.2270 klur.”
“Watla ïa katto katne ki projek, ka song pisa ka dei kaba la pynbeit hi da ka Sorkar Jylla bad ka Ministry of DoNER hynrei namar ka jingduna pisa, ngi la kyrpad ïa ka CEA ban ïakren ïa kane ka kam bad ka Ministry ba kan ai lem sha ngi ïa ka jingïarap song pisa na ka bynta ki kam kiba dang ïaid ha ki Jylla NE. Kane kan ïarap ïa ngi namar ka jingduna pisa bad kumjuh ruh ban ïoh ïa une u transmission line,” la ong u Myntri.
Shuh shuh na ka liang jong u Mondal u la pyntip ruh ba u la kren ïa kane ka kam ba ïadei bad ka jingdonkam u transmission ïa ki Jylla ka thaiñ shatei lam-mihngi bad Sikkim haduh u snem 2031-32 bad ka jingdonkam ïa ka jingïarap song pisa na ka Ministry of Power.
U Myntri u la kyrpad ruh ban ai kyrpang ïa u 132 KV line sha ki jaka khappud bad ka Bangladesh kynthup ïa ka Baghmara bad kiwei ki jaka sor, ban pynjanai ïa ka jingsam bording bad na ki bynta ki kam kiba kongsan.
“Nga la kyrpad ïa u Chairman ka CEA ban ïarap ïa ngi ban pynïoh ïa u 132 KV line la kumno kumno haduh Baghmara bad kiwei ki jaka sor ba don ha khappud ka Bangladesh. Kane kan ïarap ha kiba bun rukom kynthup ïa ki jingdonkam lada jia kano-kano ka jingjia ha khappud,” u la ong.
U Myntri u la kren ruh halor ka jingdonkam ban kyntiew kyrdan noh ïa u transmission line ha ki jaka kum ha South Garo Hills, West Garo Hills bad South West Khasi Hills.
Nalor kane, u Mondal u la pynbna ruh ba ka tnat ka la ïoh ïa ka jaka ban buh ïa ka sub-station 132 KV ha Nongpoh, ka ban ïarap ban weng ïa baroh ki jingeh ha ka jingpynpoi bording bad kiwei ki kam haba ïadei bad ka Ri-Bhoi District.
