Mawkyrwat, Naitung 09
Ka Federation of Khasi Jaiñtia & Garo People (FKJGP) Mawkyrwat Circle ka la kyrpad na ka Sorkar ban ai nam Sngap Sing Syiem noh ïa ka Circuit House kaba don ha Mawkyrwat.
Ka seng hapoh ka jingïalam u Bah Enbor Syiemïong, Secretary FKJGP Mawkyrwat Circle ryngkat ki dkhot, ha ka 9 tarik u Naitung 2025 ki la leit ban ïakynduh ïa u Bah B Mawlong, Deputy Commissioner jong ka South West Khasi Hills District ban pynkynmaw biang ban pynkylla kyrteng noh ïa ka Circuit House Mawkyrwat sha ka kyrteng u Sngap Sing Syiem kum shi bynta ban ai nam bad pynsah kynmaw ïa une u Syiem bakhraw ka Hima Maharam.
Katkum ka kot jingthoh ba ka seng ka la ai ha u DC, ka la ong ba naduh ka por ba la tei ïa u motdur jong u Sngap Sing Syiem ha phyllaw jong ka Circuit House, ka nongrim ka long ban ai nam bad ai burom ha ka kyrteng jong une u Syiem.
Shuh shuh u Bah Enbor Syiemïong haba kren sha ki lad pathai khubor u la ïathuh ba ha ki por ba la dep ki la don kiwei ki sengbhalang kiba wan buh jingthoh na ka bynta ban pynkylla kyrteng ban ai nam ïa une u Syiem bad ka FKJGP ruh ka ïeng ha kajuh ka nongrim bad kiwei ki para sengbhalang.
Namar kata, ka seng sa shisien ka kyrpad ïa u DC ba un shimkhia kham kloi ïa kane ka kam bad ban phah jingthoh sha ka Sorkar Jylla.
U Bah Enbor Syeimïong u la ïathuh ruh ba hadien ka jingkynduh, na ka liang u Bah B Mawlong u la kular ban shimkhia ïa kane ka kam.
