Shillong, Naitung 09
Uwei u Sub-Inspector (SI) bad saw ngut ki pulit langrut jong ka thanat Sohra ki la shah sospon ne weng kam shipor halor ka jingkynnoh donkti ban tied bad bom ïa uwei u samla hapoh ka thanat.
Ïa kane la pyntip da u Superintendent of Police (SP) ka East Khasi Hills, Bah Vivek Syiem ha ka kyrwoh kaba u la pyllait hadien ka jingïohpdiang ïa ka kaiphod jingtohkit, kaba la khlieh da u Sub Divisional Police Officer (SDPO), Pynursla Bah B Wanswett, MPS, kaba la aiti ha ka Sngi Balang.
La ong ruh ba nalor kane, na ka liang ka tnat pulit ka la register mukotduma kam bymman ruh pyrshah ïa kine ki pulit ha thanat Sohra bad la pynngat ïa ki hapoh ka kyndon 120 (1)/3(5) BNS.
U Bah Vivek u la pyntip ba ka jingtohkit ïa kane ka mukotduma kam bymman ba la register pyrshah ïa ki san ngut pulit, la khlieh da u ophisar ha ka kyrdan Inspector, uba dei na kawei pat ka thanat khnang ban pynthikna ïa ka jingtohkit ka bym shah liang.
U SP haba ïathuh ïa kane ka jingjia naduh kaba sdang, u la pyntip ba ha ka 1 tarik Naitung, ki pulit ka Sohra ki la ïohpdiang ïa ka ejahar na u Rangbah Shnong ka Mawkisyiem, Sohra, kaba pyntip ïa ka jingshoh briew bad byrngem-byrsit u Getwin Jyrwa ha Mawap, Mawkisyiem. La ïathuh ba une u samla u la pyndonkam ruh ïa ki ktien khlemakor bad leh khlemraiñ ruh hakhmat uba bun balang.
U Bah Vivek u la ïathuh ba wat hapdeng ka jingkhot hajir haduh arsien da ka Dorbar Shnong Mawkisyiem, u Getwin Jyrwa u khlem leit mih satia bad dei halor kane ba la ujor noh da ka ejahar.
Halor ka ejahar ba la ïoh, ki pulit ka Sohra ki la register case hapoh ka kyndon 131/133/296 (a) jong ka BNS pyrshah ïa une u samla bad pyntip ruh ba ki pulit ki la leit wad ïa une u samla ha ka miet 2 tarik hadien ka jingïoh jingtip ba u don ha ïing hynrei une u samla u la ïoh phet shuwa ban wan poi ki pulit.
U SP u la ïathuh ba dei ha ka sngi kaba bud por 11 baje mynstep ba ka kmie Kong Mildred ka la wan aiti noh ïa u Getwin sha thanat.
Shuh shuh la pyntip ba dei ha ka 7 tarik Naitung, u SP u la ïohpdiang ïa ka ejahar na ka Kong Mildred Jyrwa kaba kynnoh ba u khun jong ka, u la shah pynshitom beaiñ ha ki pulit ka Sohra hapoh ka thanat haduh ba u la mynsaw jur. Ka la pyntip ruh ba ha ka 3 tarik Naitung, ka la leit aiti ïa la u khun sha ki pulit ka Sohra hadien ka jingïoh jingtip ba ki pulit ki la wan wad ïa u ha ïing. Ka Kong Mildred ka la leit aiti ïa u khun ha ka por 9 baje mynstep bad ynda ka la leit shaw ha ka por janmiet, ka la lap pynban ïa u khun hapdeng ka jingmynsaw jur namar ka jingshah bom shah tied dusmon ha ki pulit ha thanat Sohra.
Hadien ba sei ïa u na thanat, la ïalam noh ïa u sha Sohra CHC bad hadien la pynkit noh sha Shillong Civil Hospital ba un ïoh ïa ka jingsumar ba kham paka.
U Bah Vivek u la ban jur ba ka tnat Pulit ka ïengskhem ha ka nongrim ban bat ïa ka aiñ bad ban pynthikna ïa ka jingtrei kam kaba don jingkitkhlieh ha ki kyrdan bapher bapher. U la ong ba ka tnat kan leh da kaba tyngeh pyrshah ïa kino-kino ki Pulit kiba pyndonkam bakla ïa ka bor.
