Shillong, Naitung 09 (UNI)
Ka North Eastern Hill University (NEHU) shen kan sa wanrah ïa ka jaka hikai ktien Russia ne ka ‘Russian Language Centre’ kumjuh ban wad ïa ki lad ki lynti na bynta ki jingïatreilang hadien-habud ha ka liang ka pule-puthi, ki kam wad bniah, bad ka leit ka wan ki samla pule na kawei ka shlem pule sha kawei pat.
Ïa kane ka jingtyrwa la wanrah ha ka jingïakynduh jong ka jingïalang ‘virtual’ hapdeng ka NEHU bad ki shlem pule ka Russia bad ka thmu ban pynskhem ïa ka jingïadei ban pynkhlaiñ shuh-shuh ïa ka jingïatreilang hapdeng ka India-Russia ha ka liang ka pule-puthi, ong u Vice-Chancellor (VC) ka NEHU, u Prof. Prabha Shankar Shukla.
U Shukla u la ong ba kane ka jaka ba la tyrwa ka kyrmen skhem ban ai jinghikai ha ka liang ka ktien ka thylliej bad ka jingsngewthuh ïa ka lariti, kaba pynkup bor ïa ki samla pule ban ïeng lang ha syndah bad ki paralok jong ki na sha shiliang pyrthei.
“Kane kam dei tang shaphang ka jinghikai ktien. Ka dei shaphang ka jingpynkupbor ïa ki samla pule jong ngi ban ïeng lang ha syndah bad ki paralok jong ki na sha shiliang pyrthei,” u la ong.
Ka Ufa University of Science and Technology (UUST), ka shlem pule ka Russia, ka la pynpaw ka jingsngewtynnad ha ka ban pdiang sngewbha ïa ki samla pule ‘riewlum na ka Thaiñ Shatei Lam Mihngi ka Ri India na bynta ki ‘internship’, ki prokram jingpule, bad ki jingïatreilang ha ka jingwad bniah.
“Ngi thrang ban pdiang sngewbha ïa ki samla pule ‘riewlum na ka Thaiñ Shatei Lam Mihngi jong ka ri India ban ïashim bynta ha ki ‘internship’, ki prokram jingpule ba lyngkot, bad ka jingïatreilang ha ka jingwad bniah ha Ufa,” ong ka Vice-Chancellor na bynta ka International Affairs, UUST, ka Rita Filippova.
