Nongstoiñ, Naitung 11
U MP ka 1- Shillong konstitwensi u Dr. Ricky A.J Syngkon mynta ka sngi ka 11 tarik u bnai Jylliew 2025 u la pynïaid ïa ka jingïalang bishar bniah jong ka District Development Coordination & Monitoring Committee (DISHA) ha Circuit House, Mairang ban bishar ïa ka jingpyntreikam ïa ki skhim sorkar pdeng bapher bapher hapoh ka District.
Ka jingthmu jong katei ka jingïalang ka long ban pynthikna ïa ka jingpyntreikam, ka jingpynpoi hok ïa ki skhim pdeng, ka jingpyntreikam ha kaba shai bad ka jingïadei bad ki jingdonkam jong ki paidbah.
Ha kane ka jingïalang la sakhi ïa ka jingdon lang jong katto-katne ngut ki heh kiba kongsan ba kynthup ïa ka Deputy Commissioner Kong A. Kharpor, IAS, u MDC ka Parïong-Mawthadraishan konstitwensi, Bah Powell Sohkhlet, u Additional Deputy Commissioner cum Project Director, Bah A. Nongbri MCS ryngkat ki heh ophisar na ki tnat sorkar bapher bapher.
Ha ka jingïalang kaba la neh shisngi, ki ophisar jong ka District na ki tnat bapher bapher ki la ai ïa ki kaiphod halor ka jinglong jingman jong ki projek sorkar pdeng kiba kynthup ïa ka PMAY Grameen, MGNREGA, RGSA, MSSDS, MPLADS, PMFBY, RKVY, Swachh Bharat Mission, National Social Assistance Programme bad kiwei kiwei. Ki la ai ïa ka kaiphot ha kaba ïadei bad ki skhim kiba la lah ban pyndep, kiba dang ïaid ha ka jingpyntrei, ki jingeh kiba ki ïa kynduh, bad kumjuh ruh ki plan thymmai na ka bynta ka ban sa wan.
U Dr. Syngkon u la ban jur ba ki skhim jong ka sorkar ki dei ban ai jingmyntoi ïa uwei-pa-uwei nongshong shnong bad u la pynshlur ïa ki ophisar ban shakri da ka jinglong hok, ka jingkitkhlieh, bad kaba khuid. U la pynpaw ruh ïa ka thong jong ki nongïalam ka ri India ban pynlong ïa ka ri India kum ka ri ka ban sa kiew ha ki liang baroh tad ha u snem 2047 bad u la ban jur ïa ka jingdonkam ban ïatreilang ban pynurlong ïa kane ka thong.
