Shillong, Naitung 13
U Special Officer uba la thung da ka ïingbishar Meghalaya High Court u la ai jingmut ïa ki bor distrik jong ka East Khasi Hills ban ym ïaid shakhmat bad ka jingpynkynriah ïa ki nongdie madan ha Khyndailad.
U Senior Advocate, Subhasis Chakrawarty, ha ka shithi sha ka Deputy Commissioner, Kong R.M. Kurbah, u la kdew ïa ka hukum jong ka High Court kaba la pynmih ha ka 3 tarik Naitung, kaba bthah ban pynkhreh ïa ka thup kyrteng jong ki nongdie madan kiba la ïoh jingbit lane kiba la ïoh laisen da kaba ïamir jingmutlang bad ka seng ki nongdie madan lem bad ki bor pynïaid.
Ïa katei ka thup kyrteng, katkum ka jingbthah jong ka High Court, ym pat shym la lah ban pynkhreh haduh mynta, ha kawei ka liang kaba pynlong ïa ka mat ba ïadei bad ka jinglong-jingman jong ki nongdie madan ha katei ka thaiñ, ka bym pat lah ban pynbeit.
Une u Special Officer u la ong ba kano-kano ka jingpynkynriah ha kum kane ka por kan long ka jingpynkheiñ kaba shai ïa ka hukum jong ka High Court.
Halor kane, u Special Officer u la ai jingmut ïa ka Deputy Commissioner ban kiar na kaba ïaid shakhmat bad ka jingpynkynriah tad haduh ban da bud ïa ki jingbthah jong ka High Court.
“Ïa kane ka jingbthah jong ka High Court ym shym la bud bad kumta ka jingkylli ba mano kita ki nongdie madan ki bym don laisen ha ka thaiñ Khyndailad ka la sah khlem da lah ban pyntikna. Kumta lada ïaid shakhmat bad kano-kano ka jingpynkynriah ha kane ka por, te kane kan long ka jingpynkheiñ kaba shai ïa ka hukum jong ka High Court. Kumta, lah ban ai jingmut ban ym ïaid shakhmat bad ka jingpynkynriah ha kum kane ka por,” la ong u Chakrawarty haba jubab halor ka shithi ka DC ha ka 8 tarik Naitung kaba la thoh sha u Chief Executive Officer (CEO), Shillong Municipal Board (SMB).
Ha ka hukum kaba la pynmih ha ka 3 tarik u Naitung, ka High Court ka la ong: “(ii) Hapoh jong u Special Officer bad ha ka jingïamir jingmut bad u General Secretary, ka seng ki nongdie madan, ki bor pynïaid bad bor pulit kin pynkhreh ïa ka thup kyrteng jong ki nongdie madan kiba la ïoh jingbit ne kiba don laisen ïa kaba la ong ba ki don kumba 349 ngut,” ne kaba ong ha ka ktien nongwei ((ii) Under the Special Officer and in consultation with the General Secretary, Hawkers’ Association, the local and police authorities will prepare a list of authorised or licensed vendors which are stated to be around 349.)
Ka Ïingbishar ka la bthah ba yn shah ïa ki nongdie madan kiba don laisen ban die jingdie ha ka thaiñ Police Bazar ha ki kynta ba la buh (12:30 baje mynsngi haduh 2 baje nohphai sngi bad 7:30 baje mynmiet haduh 9 baje mynmiet), katkum ka jingkular jong ki ban ym palat ïa ka por ba la buh bad ban pynthut ïa ka leit ka wan jong ki kali ne ka ïaid ka ïeng jong ki briew. Yn ym shah ïa ki nongdie madan ki bym don laisen ban die jingdie ha katei ka thaiñ.
Ka Ïingbishar ka la bthah ruh ba ki nongdie madan kin kynriah sha kiwei pat ki jaka die jingdie shisien ba la pynbiang da ki bor pynïaid, bad kiwei pat ki nongdie madan ki lah ban aplai na bynta ki laisen kiba biang.
Shuh shuh la bthah ïa u Special Officer ban pyntikna ïa ka jingpyntreikam kaba suk ba saiñ ïa ki hukum jong ka Ïingbishar bad ban aiti ïa ka kaiphod hapoh ka 5 tarik u Nailar, 2025.
