Shillong, Naitung 13
Ki pulit ka Gokarna ki la lap ïa kawei ka longkmie na Russia bad ar ngut ki khun kynthei dangrit ba shong ba sah ha kawei ka krem kaba jngai bad kaba don jingma.
Kane ka krem ba shong ba sah katei ka longkmie ryngkat bad ar ngut ki khun ka dei kaba don hajrong u lum Ramatirtha, ha Karnataka kaba don ha ka Gokarna.
Ha ka jingïaid pahara ki bor pulit ka Gokarna ki la lap ïa kitei 3 ngut shi kmie shi khun na Russia na kawei ka krem kaba la ker da ki jaiñ.
Kane ka jingjia ka la paw pyrthei ha ka 9 tarik u Naitung 2025, ha ka por kumba 5 baje eiei janmiet, ha ka por ba u Inspector Sridhar ha ryngkat ka kynhun jong u na Gokarna ki dang pahara ha katei ka thaiñ ban pyntikna ïa ka jingshngaiñ jong katei ka jaka jngohkai pyrthei.
Katba ki dang ïaid talasi ha katei ka khlaw ki la ïohi ïa ka jingkhih hajan kawei ka krem kaba don ha ka jaka kaba don jingma bad kaba lah ruh ban twa khyndew.
Hadien ka jingpeitbniah ki bor pulit ka Gokarna ki la lap ïa ka Nina Kutina, 40 snem, ka kynthei kaba dei na Russia kaba sah hapoh jong katei ka krem lem bad ar ngut ki khun kynthei jong ka, ka Prema 6 snem, bad ka Ama 4 snem.
Haba la kylli bniah ïa katei ka kynthei na Russia ka la kam ba ka la leit na Goa sha Gokarna ban wad ïa ka jaka ba kynjah na ka bynta ka jingim ba kynja mynsiem.
Shuh shuh, ka Nina ka la batai ba ka la jied ban sah hapoh katei ka krem ban buh beit ha ki jingduwai jngai na ka jingpynthut jong ka jingim ha ki jaka sor. Katba ki jingkren jingmut jong ka ki long kiba kynja mynsiem, ki bor pulit ki la sngewkhia jur pat ïa ka jingshngaiñ ki khynnah ha kum katei ka jaka.
Ka lum Ramatirtha kaba don ha katei ka krem ka la ju jia ka jingtwa khyndew kaba jur ha u Naitung 2024 bad ka dei ka jaka sah jong ki mrad khlaw ba shyrkhei kynthup ki bseiñ bad kiwei kiwei de ki mrad.
Hadien ba ki bor pulit ki la ïasyllok ïa katei ka longkmie bad pyntip ïa ki jingma, ka kynhun pulit ka la lah ban pyllait im ïa kane ka longkmie bad ar ngut ki khun jong ka.
Ha ka jingwad bniah la pynpaw ba ka Nina ka la rung nyngkong sha India da ka Business Visa kaba treikam haduh 17 tarik u Ïaïong 2017, ïa ka exit permit la ai da ka Foreigners Regional Registration Office (FRRO) Panaji Goa, ha ka 19 tarik u Ïaïong 2018 bad ki jingthoh na ki record ka pyni ba hadien kane ki la leit noh sha Nepal bad la rung biang sha India ha ka 8 tarik u Nailur 2018, da kaba pynshong nongrim ïa kane ka jingpynkheiñ ïa ka Visa la pynkynriah noh ïa katei ka longkmie bad ki khun kynthei ar ngut sha ka Women’s Reception Centre ha Karwal kaba la pynïaid da ka Department of Women and Child Development bad mynta la buh ïa ki ha katei ka jaka.
