Shillong, Naitung 13
Uwei u samla na Meghalaya uba dei na ki thaiñ Ribhoi District u la hap ban pan jingïarap na u Bah Marvel Sungoh uba don ha Delhi bad trei ha My Home India namar ba um tip lynti ban wanphai na Andhra Pradesh sha Meghalaya.
Haba ïoh ban ïakren bad u Bah Marvel, u la ïathuh ba ki don 16 ngut ki samla na Meghalaya kiba leit bylla kum ka kam ban trei ap pahara ha Andhra Pradesh kaba la ïaid kumba ar bnai eiei.
U la ïathuh ba uwei napdeng kine 16 ngut u la kwah ban wanphai ïing noh namar um juh ban leit bylla sha kawei ka jaka ha Andhra Pradesh. Kumta haba u la wad jingïarap ym don ba tip lynti bad khatduh u la ïoh ban phone ïa u Bah Marvel.
Shuh shuh u Bah Marvel u la pyntip ba ka jingïoh number phone une u khynnah ka dei namar u kpa jong une u khynnah u la buh bha ïa u number jong u haba la pynmih khubor ha U Nongsaiñ Hima ha kine ki bnai ba la dep halor ka jinglah jong u ban ïarap ïa ki samla kiba jah lynti sha kiwei ki jylla.
“Haba nga don sha Delhi, une u khynnah u don sha Andhra Pradesh nga la shem shitom ban leit ïarap namar bun ki paralok na katei ka jylla ki sah palat 200, haduh 300 kilometre na jaka sah uta u khynnah,” u la ong.
U la pyntip haba u la ïoh ban phah ïarap ïa uwei u paralok uba don hajan bad ka jaka sah uta u khynnah, ka don jingeh khyndiat namar une uba ïarap bad une u khynnah kim nang than ban kren hindi ne phareng ka la pynbunkam ïa u ban hap ban ïakren ban batai da ka phone.
U la pynpaw ka jingai khublei ïa kito ki paralok na Andhra Pradesh kiba la ïarap ban pynpoi haduh station rel bad une u khynnah u la poi ïing ha ka step jong ka 11 tarik mynta u bnai.
U Bah Marvel u la kyntu ïa ki samla haba ki leit bylla shabar ka jylla ki dei ban long kiba ïaishah bad da kylli pyrthew bha khnang ban ym buh jingeh ïa ki bahaïing.
