Jowai, Nailar 07
Hadien ka jingshem ïa ka jingtngit bad jingbym biang ka rukom shet rukom thew, ka tnat Food Safety ka jylla kala phah khang khyrdep ïa ki lai tylli ki dukan ha East Jaiñtia Hills District.
Kitei ki dukan ba shah khang ki long kawei ka Restaurant ba la ai kyrteng Exiotic kaba don ha Khliehriat bad artylli ki dukan pynmih Ice Cream bym don kyrteng kiba don ha Dkhiah, East Jaiñtia Hills District ba la pynïaid da ki bar Jylla.
Ka tnat Food Safety hapoh ka jingïalam ka Kong DBS Mukhim, Deputy Commissioner bad ka Assistant Commissioner Food Safety Jaiñtia Hills ka Kong E Pyngrope, Food Safety Officer West Jaiñtia Hills District Bah PW Lyngdoh ryngkat ka jingsynran ki pulit, ha ka 7 tarik Nailar kila hiar jurip ïa ki dukan die jingbam ha West Jaiñtia bad East Jaiñtia Hills District.
Ha ka jingjurip ïa ki dukan ha East Jaiñtia Hills District, kine ki heh ka tnat kila lap ïa ka jingtngit bad jingjaboh jong kitei ki dukan, wat ki nongtrei ruh ki long kiba ja-ing.
Kane ka jinglong jingman bad jingbym lehkhuid ka buh jingma ïa ki paidbah nongbam nongdih, la ong ka Kong Mukhim.
Ka tnat Food Safety ka la bthah ïa kine ki dukan ba kin khang khyrdep haduh ba kin da pynbiang lut ïa baroh ki jingbthah kynthup ïa ki kot ki sla bad ka jingkhuid jingsuba.
Katba ha West Jaiñtia Hills District, la jurip ïa baroh ki dukan die doh masi bad dohsniang ba don ha Iawmusiang.
Hadien ka jingjurip ka Kong DBS. Mukhim kala ong, ka dang long kaba eh namar ka dei ruh ka sien kaba nyngkong ïa ka ban ïohi ïa ka jinglong jingman jong ka ïew die doh hapoh Jowai, hynrei ïa mynta donkam ka jingïatreilang shwa jong ki nongdie doh bad ki nongpynïaid ïew ryngkat ka tnat.
Kala pyntip ba kan sa khot ka jingïakynduh lang jong baroh ki nongdie doh bad nongpynïaid ïew ha Jowai ban ïakren ïamir jingmut ban leh ïa kaei kaba bha tam bad ban wanrah ka jingkylla kaba lah ban neh ha kaba ïadei bad ka doh.
Ka Kong Mukhim ka la pynpaw ruh ka jingbynñiaw ban ïohi ïa ka jinglong jingman jong ka Iawshyiap kaba lang da ki jaboh jabain, bad buh jingma ïa ka koit ka khiah jong ki nongshong ïew.
