Shillong, Nailar 07
U Myntri Rangbah ka Jylla u Conrad K Sangma u la pynskhem biang ïa ka jingangnud jong ka Sorkar ban ïakren bad ki paidbah bad pynbeit ïa ki jingsngewkhia jong ki hashwa ban shim ïa ka rai ban ïaid shakhmat ban pyntreikam ïa ki projek lynti rel ha ki lai tylli ki thaiñ jong ka jylla.
U Myntri Rangbah u la kyrpad ruh ïa baroh ki seng saiñpyrthei ban wan shakhmat ban ïashim bynta ha ka jingïalang ka ban sa long jong baroh ki seng saiñpyrthei ne ka All Party Committee on Railway ba la thaw da ka Sorkar, da kaba ban jur ïa ka jingdonkam jong ka jingïakren ïatreilang ha kaba thaw dur ïa ka lawei jong ka projek.
“Nga la kren shai bha ba haba phai sha ka jingkiew ka ïoh ka kot, ka lynti rel ka long kaba kongsan bha ïa ngi la ka dei ha Khasi Hills, Jaiñtia Hills ne Garo Hills. Nga la shai bha ha ka jingpyrkhat jong nga ba ka long kongsan bha. Ngi donkam ïa ka hynrei ha kajuh ka por, nga la kren shai ba ka dei ka kam kaba jyrwit jyrwat bad ba don shibun ki jingpynsngew na ki paidbah,” ong u Conrad haba kren sha ki lad pathai khubor haba jubab ïa ka jingkylli la ka Sorkar kan bteng ban buddien ha kaban wanrah ïa ka lynti rel ha Jylla.
“Hooid, ki Myntri jong ngi kila wan shakhmat bad kila ong ba ka dei ban jia hynrei nga la kren shai ïa ka lynti treikam jong nga ba ngin shim lang ïa ki shnong ki thaw bad ki paidbah ryngkat bad ngi ha ka rai ba ngi shim watla ka dei ha Garo Hills bad Khasi Hills, ngin sa ïakren bad ki paidbah, ngin sa ïakren ïa ki bad ngin pyrshang ban pynkohnguh ïa ki bad lada don kino kino ki jingsngewkhia bad ki jingeh, ngin sa pyrshang ban pynbeit ïa ki,” u la ong bad bynrap “Ngin ïalam lang ïa ki shnong ki thaw shakhmat ha kaei kaei ka rai ba ngin shim khnang ba ka roi ka par kan wan hapoh ka jylla Meghalaya.”
U Conrad u la pynthikna ruh ba ka jingleh survey ïa ka jingtyrwa ban pynpoi lynti rel kam pat sdang satia ha South Garo Hills.
Hynrei u la pyntip ba u Myntri ka Sorkar Pdeng u la kylli ba ka long ne em kaba lah ban pyntrei ïa ka projek lynti rel ha kiwei pat ki bynta jong ka Jylla lada kam wan ha Khasi Hills.
“Nga la ong ha u (Myntri ka Sorkar Pdeng) ba nga la ïakren bad ki nongmihkhmat ka rilum Garo bad Jaiñtia bad kila pyni ïa ka dak kaba sngewtynnad bad halor ka jingpynpaw jong ki, nga la kren ïa ki ba ngi kwah ban ïoh lang ïa ka jingmynjur u paidbah, ki sengbhalang bad kiwei kiwei,” bynrap u Conrad.
Haba kylli halor ka Committee on Railway, u Myntri Rangbah u la ong, “Sa shisien nga kyrpad ba ki seng saiñpyrthei bapher bapher ki dei ban wan ïakren bad ngi. Kane ka dei ka rukom treikam ka riti synshar paidbah bad ka Sorkar kala ai ha ki ïa ka rynsan. Namar kata, ngi dei ban wan shakhmat ban ïakren”.
“Ngi la khot ïa ki briew ba kin wan hynrei don katto katne ki seng saiñpyrthei kiba kyntait bad mynta, ngi kum pyrkhat la kine kijuh ki briew kiba ong ba dei ban don ka Committee mynta ki ong pat ba kim kwah ban ïadonbynta ha ka Committee, ngam tip shuh kaei ka jingthmu jong ki haba ki kren ïa kane ka kam hapoh ka ïingdorbar thawaiñ. Hynrei long kat kaba long, ngi la rai ban pynïaid shakhmat ïa ka jingïalang kampher katno tylli ki seng saiñpyrthei ki wan,” u la ong.
“Ka jingwan sha ka jingïalang jong ka komiti kam dei ka jingkyrshan ïa ka kam bad ong peit ngi kwah ïa ka rel. Ka komiti ka dei ka rynsan ban ïakren. Lada phim kwah ban ïakren ruh kumno ngin ïaid shakhmat,” u la ong.
“Kumta nga pyrkhat ba ka dei ban don ka jingkylla ha ka jingmut jingpyrkhat, ka jinglong babha. Ngi ailad ïa kata ka rynsan bad jingïakren ban jia. Kim kwah ban shim ïa kata ka rynsan ruh kumta ngan ong aiu. Nga kyntu ïa ki nongïalam bapher bapher to ngin ïakren namar nga thikna ba ki lah ban don ki lad ki lynti kiba ngi lah ban wad ban weng ïa ki jingeh kiba ki briew ki don bad pynban ki don ïa ka roi ka par kaba ngi dei hok ban ïoh,” ong u Conrad.
