Nongpoh, Nailar 07
Ki pulit jong ka thanad Nongpoh ha ka janmiet jong ka sngi Palei ki la ïoh ban bat ïa uwei u bar jylla uba dei u nongkhaïi drok na ka jylla Assam katba u dang thmu ïadie ïathied drok bad arngut kiwei pat ki khynnah Khasi harud jong ka surokbah National Highway marjan bad ka ophis treikam jong ka Fire & Emergency Services ha Nongpoh.
Katkum ka tyllong khubor ba la ïohlum, la ïathuh ba ïa utei u bar jylla lem bad ar ngut ki khynnah Khasi, la ïohi nyngkong da ki briew kiba ïaid ba ïeng bad haba la pyrshang ban kylli ki ïaleh aiu ha katei ka jaka, kitei ki ar ngut ki khynnah Khasi ki la knieh ïa u shabi jong ka Scooty (ML10-C-4833) jong utei u bar jylla bad phet bak na katei ka jaka. Namar ka jingbym don shuh u shabi, utei u bar jylla u la shu khynniat ïa katei ka scooty bad pyrshang ban phet, hynrei la ïoh ban bat noh da ki katto katne ki khynnah samla, kiba la ai jingtip noh pat sha ki bor pulit ka thanad Nongpoh.
Hadien ka jingwan poi ki pulit, la pynlong ïa ka jingtalasi ïa utei u bar jylla uba la tip kyrteng kum u Sirajul Haque (36 snem) na ka shnong Moiradia jong ka Barpeta District ka jylla Assam bad na ka met ka jong u, ki pulit ki la ïoh ban kurup kumba 5 synduk sabon u drok heroin uba don ïa ka jingkhia kaba 49.44 gram. Nalor utei u drok, ki bor pulit ki la kurup ruh ïa kawei ka mobile phone, kawei ka pla kaba la thep ïa u drok ryngkat bad katei ka scooty (ML10C4833).
Ha kaba ïadei bad kane ka jingjia, ki pulit kila register da ka case pyrshah ïa u Sirajul Haque ha thanad Nongpoh hapoh ki kyndon jong ka aiñ Narcotic Drugs & Psychotropic Substance (NDPS) bad ka jingtohkit ban lap dien shuh ïa kiwei kiba donkti ka dang ïaid shakhmat.
Sa ha kawei pat ka jingkhynra hynnin ka sngi, ki pulit ka Ri Bhoi ki la ïoh ban kurup kumba 2.047 kilo u Ganja na kawei ka kali Grand i10 kaba don ïa u registration number ML10-C-3646 kaba la pyndonkam da Bah Franky Marsing (27 snem) bad u Bah Shan Sylliang (24 snem), kiba dei na ka shnong Iewmawlong, Ri Bhoi District.
Katkum ka khubor ba la ïoh lum na ki pulit, la ïathuh ba ki pulit ki la ïoh ban kem ïa kitei ki ar ngut katba ki dang thmu ban phah parcel ïa utei u Ganja sha ka nongbah Chennai lyngba ka Courier. Halor kane ka bynta ruh, ki pulit ki la register case pyrshah ïa kitei ki ar ngut ha thanad Nongpoh katkum ki kyndon aiñ jong ka Narcotic Drugs & Psychotropic Substance (NDPS) bad ka jingtohkit ka dang ïaid shakhmat.
