Shillong Nailar 07
Ka United People Forum (UPF) ha ka 07 tarik u Nailar 2025 ka leit ban ïa kynduh ïa ka Director General of Police (DGP) ka Kong Idashisha Nongrang ban dawa ai noh ïa ka Police Traffic Branch hapoh umsning bad ka jing bym don ka Fire Emergency Station ha ka thaiñ.
Haba kren sha ki lad pathai khubor na ka liang u Dr.David Lyngdoh u ba dei u chairman ka UPF u la ong ba ka DGP ka la pyntip ba haba ïa dei bad ka Fire Emergency Station na ka tnad ka lah dep ban wan jurip naduh u SP bad ka Umsning Town Dorbar ruh ka lah long kaba la khreh ban ai jaka.
Ka seng ka la ïakren ruh haba ïadei bad ka Police Traffic Branch namar kane ka long kaba donkam palat hapoh Umsning ïa mynta, namar kumba long ha ki sngi ïew ka Umsning ka khapniah bha bad ki kali ruh ki la shu ïeng pathar kat sha ba lap.
U Dr David u la ong ba kum ba long mynta ka Umsning ka ïoh ïa ka Police Station naduh kham mynshwa hynrei ka jingtrei kam jong ka pat ka la Suki sha palat.
“Lada ym lah buh ïa ka Traffic Branch ha Umsning kan wanrah ïa ka jingkhapniah kaba jur bha bad kan wanrah ruh ka jing dheng kali na ka por sha ka por” la ong u Dr.David.
Kumta ka seng ka la dawa na ka DGP ba kan ai noh ïa ka Traffic Branch ha Umsning bad nalor kata ruh ki la dawa ban ai noh da ki Homeguard ruh khnang ba ma ki, kin lah ban ai ka jingïarap.
