Shillong, Nailar 07
Ka Shillong Commerce College ka la kot sha u mawjam uba kongsan bha ha kaba ka la ïoh ban pynlong ïa ka Convocation Ceremony kaba ar jong ka ha ka 7 tarik u Nailar 2025, kaba rakhe ïa ki jingjop ha ka jingpule jong palat 400 ngut ki samla pule kiba la pyndep ïa ka kyrdan pule na ka Commerce bad Arts stream.
Ïa kane ka jingpynkup burom na ka bynta ki khynnah kiba la pyndep ïa ki jingpule jong ki na kane ka shlem ai jinghikai, la leh da u Prof. Henry Lamin uba dei u Pro-Vice Chancellor barim ka North-Eastern Hill University (NEHU) bad uba dei ruh u Myntri barim uba dei khmih ïa ka tnat Pule Puthi, bad mynta uba dei kum u President jong ka Managing Committee katei ka kolej.
Ha kajuh ka por, u Prof. Lamin u la wan ban ïadonlang ha kane ka sngi kum u Kongsan bad u la ai jingkren ha kane ka jingïalang da ki kyntien ai mynsiem ïa ki samla pule kiba dang pyndep ïa ka jingpule jong ki.
Mynta u snem, ka kolej ka la pynbna da ka jingsngew sarong ba arngut na ki samla pule jong ka ki la ïoh ïa ki kyrdan ha ka thup jong ki samla pule jong ka skulbah.
Ka Samla Maryshwaki Suchiang, na ka tnat Khasi, ka la ïoh ïa ka kyrdan kaba 7, katba u Bikash Roy, na ka tnat Commerce, u la ïoh ïa ka kyrdan kaba 10 – ka khyllipmat jong ka jingsarong na ka bynta ki samla pule bad ka jaka pule.
La pynkut ïa ka jingïalang da ka jingai khublei ïa ki nonghikai, ki nongtrei, bad ki kmie ki kpa, kiba ka jingtreilang jong ki ka la ïarap ïa ka jingjop jong ki samla pule. Ka kolej ka la pynskhem biang ïa ka jingangnud jong ka na ka bynta ka jingnang jingstad bad ka jingroi jingpar ba pura jong ki samla pule jong ka.
