Shillong, Nailar 07
Ka Sorkar Jylla ka la pynbna ïa ki jingpynkylla kiba kongsan ha ka eksamin Meghalaya Civil Service (MCS).
U Myntri Rangbah ka Jylla, u Conrad K. Sangma u la pyntip ba ka Sorkar ka la rai ban pynsangeh noh ïa ka sobjek ba lah ban jied (Optional) ha ki eksamin ïakhun MCS bad ban wanrah ïa ka sobjek bathymmai halor ka Meghalaya.
Mynta, ki don palat 23 tylli ki sobjek ba lah ban jied.
“Kaei kaba la jia ka long namar ki sobjek ba lah ban jied teng teng ka jingïakhun kaba ïaryngkat kam don namar ka shong ha kita ki 23 tylli ki sobjek kiba long ba lah ban jied bad katto katne snem, katto katne ki sobjek ba lah ban jied ki kham suk haba ïanujor bad kiwei pat bad teng teng ka rukom buh dak ka kham suk haba ïanujor bad kiwei pat bad ka long kumba ka don ka jait jingjied kaba marwei marwei kum ki sobjek kiba wan kiba jied da ki nongïakhun bad ki don 23 tylli na ki. Ka long ka kam kaba khraw ïa ka MPSC ban pynlong ïa kine ki eksamin ba lah ban jied kiba don hangta bad kumta katkum ki jingai jingmut kiba la ai da ka MPSC bad da ka MPSC Reform Committee, ïa kane ka jingai jingmut kyrpang la ai bad ngi la rai ha ka kynhun Myntri ban pdiang ïa kata ka jingai jingmut bad kane ka sobjek ba lah ban jied kaba la don hangta ha ka jingïakhun eksam MCS mynta yn weng noh ïa ka bad ha ki por ban wan ngin sa don ïa ka sobjek kaba dei shaphang ka Meghalaya,” ong u Myntri Rangbah sha ki nongthoh khubor hadien ba u la pynïaid ïa ka jingïalang jong ka kynhun Myntri ha ka sngi Palei.
Katkum ka jingong u Myntri Rangbah ka Jylla, ka rai ban wanrah ïa ka sobjek halor ka jylla Meghalaya ka long ban pynthikna ba ki ophisar ka MCS kin don ka jingsngewthuh kaba jylliew ïa ki jinglong ba kyrpang jong ka jylla, ka histori, bad ka kolshor. Kane kan pynlah ïa ki ban shakri kham bha ïa ka jylla.
“Namarkata, ngin weng noh ïa ka optional sobjek bad ngin wanrah ïa ka sobjek halor ka jylla Meghalaya jong ngi,” u la bynrap.
U Myntri Rangbah u la pyntip ba kan don ka komiti ne ka kynhun jong ki heh ki ban trei bad ai jingmut halor kiei ki jait sobjek bad kiei ki bynta kiba dei ban buh hangtei.
“Kane ka la long ka rai kaba kongsan bha bad ki jingpynkylla kiba kongsan bha ki ban ïarap ha kaba pynlong ïa ki eksamin MCS ha ka rukom kaba kham stet bad kaba kham kloi bad kaba kham kongsan kan ailad ïa ka jingïakhun kaba ïaryngkat na ka bynta baroh ki nongïakhun kiba thep ban ïakhun ïa kane ka eksamin,” u la pynskhem.
