Shillong, Nailar 07
Uwei u rangbah Khasi uba la 45 snem ka rta uba shong ba sah ha kawei na ki dong ha Shillong u la shah ieh marwei ha Bangalore ha u trai uba aikam.
Une u rangbah u la trei ha Mangalore kumba hynñiew bnai hynrei tang shi bnai um pat ïoh tulop hynrei une u trai u la ïalam noh ïa u sha Bangalore ha ka 5 tarik Nailar, 2025 bad ieh syndon sha Bangalore.
Haba une u rangbah u la shah ieh, u la klumar namar um don pisa halade namar ba um pat ïoh tulop kumta u la ïoh ban pan jingïarap na u Bah Marvel Sungoh uba trei ha My Home India uba don ha Delhi.
Une u rangbah u dei uba don khun hynrei namar ka jingban ka jingduk u la leit bylla kylleng shabar ka jylla ban phah pisa sha ki khun haba ki sah ha Shillong.
Haba ïoh ban ïakren bad u Bah Marvel Sungoh uba trei ha My home India ha Delhi u la ïathuh ba une u rangbah u la trei ha Mangalore la 7 bnai bad hadien u malik jong u, u la ong ïa u ban leit trei noh sha Bangalore, hynrei haba u la poi ha Bangalore une u malik u la ieh pynban ïa u.
U Bah Marvel u la ïathuh ba une u briew u la phone ïa u ha ka step ka 6 tarik Nailar ban pan jingïarap na u ba u ïoh tang ban poi ha Guwahati namar ba um don pisa shuh.
U la ïathuh ba une u rangbah u khlem pat ïoh wat ïa ka pisa bai trei ha ka por ba u trei ha Mangalore.
U la ïathuh ruh ba une u briew u la trei la slem shabar ka jylla hynrei um pat ju shah thok katba mynta ba u leit sha Bangalore u la shah thok.
U Bah Marvel u la pyntip ba ki nongtrei hapoh My Home India ki la ïa synñiang pisa ban phah baibam bad ban shong rel namar um don pisa shuh.
Shuh shuh u la pyntip ba ka My Home India kam ju ïarap pisa hynrei ka shu ïarap ban leit buh leit shaw haba kiba ïakynduh jingeh hynrei ïa une u rangbah la shu ïa synñiang pisa para nongtrei tang ba un poi sha Guwahati.
Mynta une u briew u la mih na Bangalore da ka rel hadien ba u Bah Marvel bad ki paralok jong u ki la ïarap ban pynsiew bai tiket.
