Shillong, Nailar 07
Ka Sorkar Jylla ka la mynjur ïa ki jingpynkylla ïa ka aiñ aiti ïa ka bor pisa jong ka Delegation of Financial Powers Rules 2006, kaba ai bor ïa u Joint Secretary jong ka tnat District Council Affairs (DCA) ha ka liang ka pisa tyngka.
Kane ka rai ka long ban pynsuk ïa ka rukom sam ïa ki bhah khajna sha ki lai tylli ki Autonomous District Council (ADC) ha Meghalaya.
Haba kren sha ki lad pathai khubor hadien ba la wai ka jingïalang jong ka kynhun Myntri, u Myntri Rangbah ka Jylla, u Conrad K Sangma u la ong ba ka tnat DCA mynta kan long kum ka tnat ‘nodal’ ban sam ïa ki bhah khajna sha ki District Council, kaba pynduh noh ïa ka jingdonkam jong ki Council ban buddien ïa ki tnat ba bun jait.
U la ong kham mynshwa, ki District Council ki ju ïoh khajna ne ki dang ïoh khajna ne ka bhah jong ki na ka tnat ka leit ka wan, ka tnat tih marpoh khyndew bad ka tnat khlaw kumta manla ka por ba ka District Council ka ju buddien ïa ki rukom treikam ban ïoh ïa ka bhah jong ki, ki hap ban buddien da ki lai tylli ki kyrdan bapher bapher bad lai tylli ki tnat bapher bapher bad ka rukom treikam ka long kaba eh bha.
“Namarkata, ngi la rai kum ka Sorkar ban pynsuk ïa ka rukom aiti bad sam ïa ka khajna ba ka DCA mynta kan long ka tnat ba dei peit ban sam ïa baroh ki bhah khajna sha ki District Council bad kin ym donkam ban leit sha kiwei ki tnat. Kumta mynta ban pynbeit ïa kata ka rukom aiti bad sam ïa ka bor pisa ruh dei ban long bad u Joint Secretary ka DCA namar ba ym don u khlieh jong ka tnat (HOD) jong ka DCA kumta u Joint Secretary u dei uba don ha kajuh ka kyrdan kum u HOD ne u Director. Kumta, katkum kata ban pynthikna ba ïa kane ka rai yn pyntreikam hok ïa ki bor pisa mynta yn aiti sha u Joint Secretary jong ka DCA,” la ong u Myntri Rangbah ha ka sngi Palei katba u dang pynksan ba katei ka sngi kan long ka rai kaba kongsan bha jong ka DCA.
U Myntri Rangbah u la pyntip ruh ba ka kynhun myntri ka la mynjur ruh ïa ka jingtyrwa ban ai ïa ka bor pisa sha u Director jong ka tnat Prosecution.
Ha kajuh ka por, ka kynhun myntri ka la mynjur ruh ban pynkylla ïa ki hynriew tylli ki kyndon shakri kiba kynthup: Ki kyndon treikam jong ka Meghalaya Subordinate Treasury Accounts Service Rules, ki kyndon treikam jong ka Meghalaya Urban Affairs, 2024, ki kyndon treikam jong ki Meghalaya Nursing Homes & Licensing Registration Rules, 2015, ki kyndon treikam jong ka tnat bishar jong ka jylla Meghalaya Judicial Service Rules, 2006, bad ka Meghalaya Judicial Rules, 2015, ka Meghalaya Police Telecommunication Service Rules, 2010, Meghalaya Directorate Establishment Administration Rules, 2005.
