Shillong 07 Nailar
Ka Hills Farmer Union (HFU) ha ka 07 Tarik u Nailar 2025 ka la leit ban ïa kynduh ïa u Chief Executive Members ka Khasi Hhills Autonomous District Council (KHADC) u Bah Shemborlang Rynjah ban dawa pynduh noh ïa ka jingot kilo.
Haba kren sha ki lad pathai khubor u Bah Commander Shangpliang u nongïalam ka HFU u la ong ba kane ka jingot kilo ïa ki marrep kalong ka jingshah khñiot beiñ ïa ki nongrep namar watla don ki marrep ki bym pyut ruh hynrei ki shah ot kilo beit.
U la ong ba ka jingïakynduh mynta bad u CEM kam shem la pynhun satia ïa ki nongrep namar ba ka don ka jingïakawang ktieh hapdeng ka sorkar bad ka KHADC da kaba kynnoh iwei ïa iwei bad kumta da ka jingbitar u la ong ba wat leh politik ïa ka kam im kam ïap jong ki nongrep.
“U CEM um shem la kular ban pynduh noh ïa ka jingot kilo namar ba ka EC ka hap phah shwa iaki Rule sha ka DCA Sorkar Jylla. Ngi la kyrpad ruh ban phah daki Enforcement ha Iewduh ban lap ïa ka jingot kilo, ïakata ruh u CEM u khlem kular eiei. Kumta kane ka jingïakynduh jong ngi bad ki nongrep ïa u CEM kam shem pynhun ïa ngi” la ong u Bah Commander.
U la ong ba ki don ki jhur ki bym pyut hynrei ki shah ot kilo bad ki don ruh ki marrep kiba pyut, hynrei ban ot kilo pat 10 kilo na ka 100 kilo kata ka long beaiñ bad ka long ka jingduh nong kaba khraw ïa ki nongrep.
Nalor kata u la kdew ruh ba u Syieng u ba duna bha ban pyut ne ban paid, hynrei ïa une ruh ki ot kilo beit 10 kilo na ka 100 kilo bad kane ka long ka jing ban beiñ ïa ki nongrep.
“Ngam tip mano ban sngewthuh ïa ka jingeh ki nongrep, hynrei la ka long ka Sorkar ne ka District Council ruh wat ju ïaleh politik. Pyndep beit hok ïa ka jingdawa jong ngi ki nongrep” la bynrap u Bah Commander.
Shuh shuh u la pynpaw ruh ka jingbitar da kaba ong “Ngim kwah ba ka District Council kan kynnoh ïa ka Sorkar bad ngim kwah ba ka sorkar kan kynnoh ïa ka District Council”.
