Nongstoiñ, Nailar 08
Ha ka step Sngi Thohdieng, ki paidbah nongshong shnong jong ki saw tylli ki shnong ba kynthup ïa ka shnong Nongjyllieh, Tynrongwahladew, Sohlait bad Lawse West Khasi Hills ki la mih paidbah ban pynpaw ïa ka jingpyrshah ha kaba ïadei bad ka ‘Bonded Warehouse’.
U la ong ruh ba ka jingmih paidbah jong ki saw shnong ka dei hadien ba ki la ïoh jingtip ba ka shnong Domsaw, West Khasi Hills ka lah pdiang ban ai NOC ïa ka ‘Bonded Warehouse’ hapoh shnong ha kaba la ong ba ka don ka jingong ban pynlong ïa ka jingïalang ha kaba ki briew na ka ophis u Supritendent ka tnad Excise kin wan ban pynshai ha kane ka step, kumta ki paidbah, ki nongshong ki saw shnong naduh 7.00 baje mynstep ki lah mih paidbah ban pyni bad pyrshah hynrei haduh 11 baje mynstep hynrei kim shym la wan satia.
Ha kajuh ka por, kitei ki saw shnong , ki la pynlong noh da ka jingïalang paidbah ha ka jingïalam jong u Bah Medral Kharbani, Headman Shnong Nongjyllieh , bad la ïoh ïa ka jingkren kynthup ïa u Bah Smowell Syiem, Headman Shnong Tynrongwahladw, u Bah Arnes Thyrniang, Headman Shnong Sohlait, ka President Seng Longkmie jong ka Nongstoiñ Area bad kiwei kiba la pynpaw ïa ka jingsngewpyrshah jur ïa katei ka jingthmu.
Shuh shuh hadien katei ka jingïalang, ki la ïarai ban thaw noh ïa ka Synjuk, ki nongsynshar shnong ban pyrshah ïa katei ka jingthmu bad ban leit ai jingthoh sha u Deputy Commissioner ka West Khasi Hills District ba un pynsangeh ban ai jingbit.
