New Delhi, Nailar 08
Ka tnad kam dewïong lyngba ki jingpyrshang ba ïai bteng jong ka, ka la plie lad ban sdang ïa ka jingtih dewïong katkum ka juk stad saian ha ka Jylla.
Kane ka dei ka dak jong ka sienjam kaba kongsan ha ka ban wanrah ïa ki rukom tih dewïong kiba la pynbeit ryntih bad kiba lah ban pynneh-pynsah ïa ka mariang ha ka Thaiñ Shatei Lam Mihngi.
Namar kine ki sienjam, artylli ki ‘Block’ pynmih dewïong ha ka Jylla ki la sdang ban pynmih dewïong hadien ba ki la ïoh ïa ki jing-mynjur kiba donkam.
Kine ki kynthup ïa ka Saryngkham A Coal Block, East Jaiñtia Hills District (kaba la ïoh jingbit ha ka 10 tarik Lber, 2025 bad kaba la sdang ïa ka jingpynmih naduh ka 3 tarik Jylliew, 2025) bad ka Pyndengshahlang Coal Block, West Khasi Hills District (kaba la ïoh jingbit ha ka 2 tarik Jymmang, 2025 kaba la sdang ïa ka jingpynmih naduh ka 5 tarik Jylliew, 2025).
Une u mawmer u pynpaw ïa ka jingkut jingmut jong ka tnad ban kyntiew ïa ki rukom tih marpoh khyndew kiba long katkum ka aiñ, kiba shngaiñ, bad kiba ïadei bad ka saian katba ka nang kyntiew ïa ka jingnoh synñiang jong ka Thaiñ Shatei Lam Mihngi haba phai sha ka jingpynbiang ïa ka bording ba ka ri ka donkam. Ka tnad kam dewïong ka khmih lynti ïa ka jingïatreilang jong baroh ki Sorkar Jylla ha kaba kyntiew ïa ka jingtih dewïong katkum ka juk stad saian bad ban pynbeit ryntih ïa ka jingshalan dewïong ha kylleng ka thaiñ.
Shuh shuh kum kine ki jingïatreilang kin don ka bynta kaba kongsan ha ka ban pyntikna ïa ka jingpynbiang bording bad ban kyntiew ïa ka roi ka par bad ka jingplie lad ïa ka ka ïoh ka kot ha ki Jylla ka Thaiñ Shatei Lam Mihngi.
