Shillong, Nailur 04
U Nongïalam ka Liang Pyrshah, u Dr. Mukul Sangma u la pynpaw ïa ka jingsngewkhia halor ka jinglyngkot eh ka por jong ka Dorbar Synrai ban wan, ka ban sdang naduh ka 8 tarik u Nailur, da kaba kdew ïa ki jingeh ban pynsngew ïa ki mat kiba kongsan hapoh ka por kaba lyngkot.
Watla u la wanrah katto-katne ki ‘Motion’ bad ki jingkylli, u Dr. Sangma ha ka Sngi Balang u la ong sha ki nongthoh khubor ba ka Liang Pyrshah kan hap ban buh hakhmat eh bad ïatreilang khnang ban pyndonkam hok ïa ka por kaba don.
U Dr. Sangma u la ban jur halor ka jingdonkam ban don ïa ka por kaba biang na ka bynta ban ïakren bad ïatai halor ki mat kiba kongsan kiba ktah ïa ka Jylla bad ki briew jong ka.
“Mynta man la ka mat ka long kaba kongsan. Ngim lah ban ong ba kane ka kham kongsan ban ïa kawei pat, hynrei ka jingshisha ka long ba ngi pyrshang katba lah ban pyndonkam la kumno-kumno ïa ka por kaba don hakhmat ki dkhot katkum ka almanak jong ka Dorbar, ngin hap ban rai da ka jingstad halor kaei ka mat, watla teng-teng ngi hap ban iehnoh ïa katto-katne ki mat bad shim noh da kiwei pat ki mat. Dei na kata ka daw ba ngi la ju ong ba haba ïadei bad ka por jong ka Dorbar, ka long kaba dei eh ba ngi don ïa ki jingkheiñ sngi kiba biang khnang ban lah ban ïakren bad ïatai bad ban shim ïa ki mat kiba ïadei bad ka jingmyntoi jong ka Jylla – jong ki paidbah namar ka ïarap ruh ïa ka Sorkar,” u la pynpaw da kaba bynrap ba kan ailad ruh ïa ki Myntri ban lum jingtip na kylleng ka Jylla.
Ki jingïatai kiba bniah ha Ïingdorbar kin pynriewspah ïa ka Sorkar bad ki dkhot ka Kynhun Myntri, ka ban pynlah ïa ki ban shim ïa ki rai kiba kham bniah, u la ong haba pynpaw ïa ka jingkyrmen ba ha ki Dorbar ban wan, kynthup ïa ka Dorbar Mang Tyngka, kin don ka almanak kaba kham jrong na bynta ki jingïatai bad jingïakren kiba kham bniah.
