Shillong, Nailur 04
Ka Village Defence Primary Committee Nongstoiñ Area (VDPCNA) ha ka 04 tarik u Nailur 2025, ka la kyntu ïa u Myntri ka tnat Social Welfare u Bah Paul Lyngdoh ban pyndonkam ïa ka jingtei jong ka tnad Agriculture kum ka jaka sumar ïa ki ba kyrni Drok (Rehabilitation Centre).
Haba kren sha ki lad pathai khubor hadien ka jingïalang bad u Myntri ka tnad Social Welfare, na ka liang u President ka VDPCNA, u Bah Mawkordor Kharsyiemlieh u la ïathuh ba ka VDP Nongstoiñ ka la sdang ban ïakhun pyrshah Drok hapoh ka thaiñ West Khasi Hills naduh u snem 2019, hynrei haduh mynta ka dang shem jingeh namar ka thaiñ kam pat don ka jaka ban sumar ïa kiba kyrni Drok.
U Bah Mawkordor u la ong ba ka VDP ka ïatreilang bad ka tnad Pulit, ka West Khasi Hills ban pynduhjait ïa ki kam sniew kiba mih namar ka jingjyllei u Drok hapoh ka thaiñ hynrei namar ka jingbym don jaka sumar (Rehabilitation), ka VDP kam lah ban shakri shispah na ka shispah ïa ki paidbah ka thaiñ.
“Ban pynthikna ba kiba kyrni Drok kin ïoh ka jingsumar ba paka, ngi kyntu ïa u Myntri ka tnad Social Welfare, ban pyndonkam ïa ka Building jong ka tnad Agriculture kum ka jaka sumar (Rehabilitation Centre)” la ong u Bah Mawkordor.
U Bah Mawkordor u la ïathuh ruh ba ha ka jingïakynduh ïa u Myntri ka tnad Social Welfare ka VDP ka la dawa ba ka Sorkar kadei ban ai noh da ki Uniform ïa ki dkhot ka VDP. “Lada ki dkhot ka VDP ki phong Uniform kan pynithuh ïa ki kum kita ki kynhun ba ïakhun pyrshah Drok bad kan ïarap ïa ki ban trei kham bha shuh shuh”, u la ong.
Nalor kane u President ka VDPCNA u la ïathuh ruh ba ki la dawa na ka Sorkar ban pynkloi ka jingpyllait ïa ka bainong sha ki VDP nalor ki tiar ba donkam ban ïakhun pyrshah Drok.
“Ngi la dawa ruh na u Myntri ban pyndait da ki kor CCTV ha ka thaiñ Nongstoiñ bad ha ka juh ka por ban pynjur ka jingkhynra ïa ka jingïadie kyiad beaiñ hapoh ka thaiñ” la bynrap u Bah Mawkordor.
