Mairang, Nailur 04
Ka District Magistrate jong ka Eastern West Khasi Hills, Mairang ka la pynjari ïa ka kyndon aiñ 163 BNSS, 2023 ban buh ïa ka jingpyrkhing bad khang pyrshah ban pynlong ïa ka jingaikhwai dohkha bad ka jingpynkhalai nusip (lucky draw) ha ki jaka kiba don harud ka surok bah NH44 E, kiba ka jingjngai jong ka pung ne ka jaka na ka surok bah, ka long tang hapoh ka 1 kilometre.
Ha ka kyrwoh khubor bala phah, ka District Magistrate kala ong ba la pynmih ïa kane ka hukum, hadien ka jingïoh jingtip ha kaba dei bad ka jingjur jong ka jingdheng kali kaba la neh da ki lai saw kynta ha ki thaiñ Kynshi-Mawlangren ha ka 27 tarik u bnai Nailar, 2025 na ka daw jong ka jingïalum briew ha ka jingïakop khwai bad lucky draw.
Shuh shuh ka la ong ruh ba lyngba katei ka jingïakop khwai ka la wanrah ha katei ka jaka ïa ka jingkhapngiah ka surok NH-44 E kat haduh ba ka la wanrah ïa ka jingdheng kali kaba jur bad kane ka la pynthut ïa ka ïaid ka ïeng jong ki paidbah nongleit nongwan. Ka District Magistrate kala ong ruh ba ha kaba ïadei bad kane ka jingpynmih hukum, lada don kino kino ki bym sngew ïahap ne sngew pyrshah ki lah ban leit ïakynduh ïa ki bor ba dei khmih.
