Shillong, Nailur 04
Ki Pulit ka Anti Narcotics Task Force (ANTF) kila kem ïa uwei u briew ha ryngkat bad 6000 tylli ki Yaba Tablets na Madanrting, Shillong.
Hadien bala ïoh jingtip ba thikna, ki Pulit ka ANTF kila bat ïa kawei ka kali Renault Duster kaba don ïa u number ML05-R-6828 ha Sawlad Madanrting.
Ha ka jingtalasi, ki Pulit kila ïoh kurup kumba 6000 tylli Yaba Tablets, kiba khia 595.07 gram, na kawei ka pla kaba don hapoh katei ka kali bala thmu ban die.
Ïa u Salnang M Sangma uba dei u trai jong katei ka pla kaba don ki Yaba Tablet la kem noh da ki Pulit.
Ha ka jingtohkit, u Salnang u la phla ba ki Yaba Tablet ki dei jong uwei u briew uba la ithuh kum u trai jong kawei ka Hotel ha Shillong.
Ka jingtohkit kaba kham bniah ka dang ïaid mynta ban lap ïa ki jingtip ba bniah halor katei ka kam khaïi ïa une u jingdih pynbuaid.
Haba ïadei bad kane, ki pulit kila register case bad ka ANTF ka dang tohkit ban lap ïa u trai jong ka hotel bad kiwei kiwei ki briew kiba lah ban donkti ha ka kam khaïi drok.
Hadien ka jingtohkit, ka ANTF kala ïoh kurup biang sa 4000 tylli ki Yaba Tablet.
Ïa une u Yaba Tablet la ïoh kurup na kawei ka hotel City Palace kaba don ha Lapalang.
Ka ANTF kala kem ïa u Kynum jong u trai kane ka hotel u Labius Aregh bad ka jingtohkit mynta kala ïaid shakhmat.
