Shillong, Nailur 04
Ki nongñiah kali kamai ba ju kamai na Shillong-Pynursla- Dawki ki la pynpaw ba ki rit mynsiem haba ki ïaid ïa ka surok kaba dang shna mynta. Haba pyrshang ban twad jingtip halor ka jinglong jingman ka jingshngaiñ ka surok Shillong Dawki ki nongñiah kali ki pynpaw kumba ka long mynta kam long kaba shngaiñ ïa ki bad ïa ki nongshong kali namar ki tieng ïoh wan hap ki maw najrong.
Haba ïoh ban ïakren bad ki nongñiah kali kamai na Shillong shaduh Dawki ha jaka ïeng kali ha Anjalee ki la pynpaw ba ka jingpyntrei ïa ka surok Shillong-Dawki ka dang kham stet ka jingtrei jobcard namar dang ïa bun ki nongtrei jobcard, katba ki nong-trei ha ka surok Shillong- Pynursla-dawki ki don ki jaka ba trei tang lai ngut kaba dei ka surok National Highway.
Haba kylli pat halor ka jingshngaiñ ka leit ka wan, ki la jubab ba ki nongleit nongwan kim don satia ka jingshngaiñ ha ka leit ka wan khamtam lei ha ba slap, hynrei ki shu shaniah ha ka bor bad ka jingpynïaid u ba na jrong. Na ka jingjia ba jia ka jinghap kali sha riat ha kine ki khyndiat sngi ba la dep ka la long ka jingpynkyndit bad ïoh jingmut ïa ka kompani kaba pyntrei ïa katei ka surok, ha kaba naduh ba jia kato ka jingjia, ka la buh dak ha ki jaka ba buh jingma bad la tap khyndew ha ki jaka ba thliew bad ba sniew ka surok.
Kane ka jingsuki ka jingpyntrei ïa katei ka surok ka la ktah jur bad buh ha ka jingeh ïa u paidbah ki ba dei ban leit shim dawai bad kiba donkam leit na ka bynta kiba bun ki kam sha Shillong bad ha kiwei ki jaka ki ba hap ban dei ïaid na kane ka surok.
Halor ka jingong u bah Prestone Tynsong ba na jingkieng Umshyrpi haduh Mylliem yn pyndep noh ha u bnai nohprah, ki la pynpaw da kaba ong ba mynta la jan poi u bnai Nohprah katba ka jingpyntrei ïa katei ka surok kumba ïohi mynta kan shem jingeh ban dep kumba la kren da u bah Prestone.
Ki la kyrpad ïa u symbud myntri rangbah ka jylla u Bah Prestone Tynsong ba un phah pyndep noh shwa ïa ka surok four lane na Umshyrpi haduh Hynñiewmer kumba u la kular ban pyndep ha u Nohprah namar ka surok na Hynñiewmer sha Pynursla shaduh Dawki ka dang shim por palat.
