Shillong Nailur 05
Ki Pulit ka East Khasi Hills District ha ka nohphai sngi jong ka 05 tarik u Nailur 2025, ki la ïoh ban kurup ïa ki suloi na lai tylli ki kali na pyrshah ka Secretariat.
Kitei ki kali ba la ïoh ban kurup ki kynthup ïa ka kali saw Audi, ka kali ïong Bolero Mahindra bad kawei pat ka kali ïong Innova.
Kine ki kali ki dei kiba la tah ïit ïong bad ar tylli na ki, ki dei kiba ym pat don ïa u Registration Nombar, lait tang ka kali Bolero Mahindra kaba don ïa u Registration Nombar ML 05 AF 0309.
Ha ka jingtalasi ki bor pulit na kitei ki lai tylli ki kali la lap ïa ki tiar siat kum ki suloi na ka kali Toyota haduh 5 tylli. Shuh shuh ha kane ka jingtalasi ki pulit, la lap ruh ïa ki Wireless Walkie Talkie bad ki Tactical Vest.
Hadien katto katne kynta ba la pynlong ïa ka jingtohkit, ki Pulit ka East Khasi Hills ki la pynthikna ba kine ki 5 tylli ki suloi kidei ki Air Gun.
La ïathuh ba kine ki Suloi kidei ba la pyndonkam beit da ki heh spah ban pyntieng briew namar ba ha kine ki kali, ki don ruh ki siren nalor ka jingdon lang ki nongbud, kiba la biang lut nadong shadong ki tiar ïaleh.
U trai jong kitei ki kali ba la shah bat ha ki pulit dei u ba la tip kyrteng u Meban Snaitang.
Hadien kata na ka liang ki bor pulit ki la rah ïa u Meban Snaitang ha ryngkat ki nongbud jong u sha Thanad Sadar ban pynlong ïa ka jingtohkit.
Haba ïoh ban ïa kren bad u trai jong kitei ki kali u la ong ba kane ka jing buh ïa ki suloi ka long kum shi bynta ban buh ïa ka private security na ka bynta jong u.
U la iathhu ruh ba u trei na bynta ka imlang ka sahlang bad ha ka juh ka por ba u dei u nongïalam ka JMDC.
Haba ïa dei pat bad ka jingïoh kurup ïa ki suloi u Meban Snaitang u la ong ba hato katkum ki kyndon aiñ ka don kano kano ka hok ba ka sorkar kan khang ïa ka jingbuh ïa ki private security, da kaba ong ruh ba wat la katta kine ki suloi kidei tang ki Air Gun.
