Shillong, Nailur 08
U Timothy D Shira, uba dei u MLA bala rangbah bha ka NPP na Resubel-para Konstitwensi u la ong ba ka jinghiar shuki noh ka jong u na ka kam Deputy Speaker ka ïingdorbar thawaiñ ka dei halor ka jingbthah jong ki Nongïalam ba hakhlieh jong ka seng ka jong u.
Haba kren sha ki lad pathai khubor ha ka sngi Nyngkong, u Timothy u la pyntip ba u la ïoh pdiang ïa ka phone call na u Myntri Rangbah u Conrad K Sangma ha ka por mynmiet jong ka sngi U Blei, ha kaba la bthah ïa u ban iehnohkam, ïa kaba u la leh khlem da buh jingkylli ïa kane ka rai.
“Ngam don eiei ban kynthoh halor kane namar nga la dep buh ïa ka shithi iehnohkam ka jong nga katkum ka jingbthah ki nongïalam ba hakhlieh duh jong ka seng ne ka ‘High Command’ bad kaei kaba la bthah ïa nga ban leh, nga la dep leh. Kumta kan shong ha ka jingstad jong u Myntri Rangbah la un ong ïa nga ban shong shawei lane leit shano shano, ïa kata ngam pat tip,” u la ong.
Haba kylli, u Timothy u la ban jur ba u bat skhem ïa ka jinglong beit long ryntih ka seng, da kaba ong ba kum u briew jong ka seng, um lah satia ban kyntait ïa ka jingkyrpad jong u Myntri Rangbah.
“Nga don ïa ka jingshaniah skhem ha u Myntri Rangbah. Ngam lah ban ong em namar u dei u Myntri Rangbah ba nga sngewjan bad sngewtynnad eh,” ong une u nongïalam ba la rangbah ha ka saiñpyrthei.
Haba jubab ïa kawei pat ka jingkylli, u Timothy u la ong “Em ngam dom satia. Nga sngewhun ïa kane ka rai”.
Haba kylli ïa ka lad ban ïoh rung khlieh ha ka jingpynkylla ïa ka Kynhun Myntri, u Timothy u la pynpaw ïa ka jingbym thikna bad ong ba kum kane ka rai ka shong eh ha u Myntri Rangbah.
“Ngam tip eiei namar kane ruh ka shong ha u Myntri Rangbah. Ngam tip la ngan shah pynrung ha ka kynhun Myntri lane ngan shah bret lane ngan shah phah shawei pat,” u la ong.
