Shillong, Nailur 08
Ka Khasi Student Union (KSU) Ranikor Circle hapoh ka jingïalam u Bah Markuni Thongni, President ha ka 08 tarik u Nailur 2025, ki la wan ban pynshai paidbah halor ka jingleh donbor u Syiem ka Hima Maharam ban knieh ïa ki jaka jong ki Khasi.
Haba kren sha ki lad pathai khubor ha Shillong Press Club, u Bah Markuni Thongni u la ïathuh ba ka jingpyrshah jong ki ïa u Syiem Maharam kam dei tang na ka daw ka jingthmu ban ai jaka ïa ki shipai, hynrei kadei ruh namar ka jingknieh jong u ïa ki jaka jong ki Khasi ruh.
U la ïathuh ruh ba une u Syiem u ju leh donbor da kaba knieh ïa ki jaka jong ki Khasi ki bym don ïa ka pata bad knieh ïa ki jaka thung tower bad khang ïa ki Khasi ban shna ïing.
“U Syiem u ju tuklar ruh wat ïa ki kam kiba rit ha kaba ïadei bad ka jingbuh ïa ki tower, da kaba u tuklar ïa ki nongïalam shnong ba dei ban siew ha u bad dei ban ai NOC ma u wat la ka jaka ka dei jong kiwei ruh”, la ong u Bah Markuni.
U Bah Markuni u la kynnoh ruh ba kane ka jingleh jong u Syiem kadei ba u rhah pisa katkum ka jinglap ki khun ki hajar ba sah ha thaiñ khappud.
Halor ka jingai jaka sha ki shipai u ong “Kato ka jaka ba ai sha ki shipai kamdei kaba lait bad kadei ka jaka jong ki nongrep, da kaba bynrap ba kiba don pata ha katei ka jaka ban ai sha ki shipai ruh kidon tang arngut bad kidei hi ki briew jong u Syiem hynrei kiba bun pat dei jong ki nongrep.”
“Kumta hadien ba ki nongrep ki la ud sha ka seng ngim lah ban shu sngap ban ailad ïa u Syiem ba un leh katba mon, ban knieh jaka ban ai sha ki shipai. Ngin nym pat sangeh ban ïakhih halor kane ka jingai jaka jong u Syiem sha ki shipai bad kan dangïai bteng”, la bynrap u Bah Markuni.
