Shillong, Nailur 08
U Lamphang ka ïingdorbar thawaiñ ka Jylla u Thomas A Sangma ha ka sngi Nyngkong u la pdiang ïa ka shithi iehnoh-kam jong u Deputy Speaker u Timothy D Shira.
Kumta, na ka liang jong u Lamphang u la khot ïa ka jingïalang ba kyrkieh jong ka Business Advisory Committee (BAC), ha kaba la rai ba ka ilekshon ban jied ïa u Deputy Speaker ba thymmai la buh ban pynlong ha ka 12 tarik mynta u bnai.
“Nga la ïoh pdiang ïa ka shithi iehnoh kam na u deputy speaker u Timothy D Shira bad ïa kaba nga la pdiang ïa ka bad mar mar nga la khot ïa ka jingïalang kyrkieh jong ka BAC ban rai bad bishar bniah ïa ka tarik jong kane ka dorbar synrai kaba dang ïaid ba ha kano ka sngi yn lah ban jied ïa u deputy speaker ba thymmai. Ka BAC ka la rai ba ka jingjied ïa u deputy speaker ba thymmai kan long ha ka sngi ba khatduh jong ka dorbar synrai,” la ong u Lam -phang sha ki lad pathai khubor hadien ba la wai ka dorbar.
Haba kylli ïa ka daw kaba la pynlong ïa u Timothy Shira ban hiar shuki noh, u Lamphang u la kdew ba u Timothy u la pyntip sha u ba u la ïoh jingbthah na ka ‘high command’ jong ka seng ban hiar shuki noh.
U Lamphang u la kiar na ka ban kynthoh shuh shuh halor kane ka kam, da kaba ong ba ka shong ha ki nongïalam ka seng ban rai ïano ba kin pynïeng na ka bynta ka kam deputy speaker.
