Shillong, Nailur 08
Ka Synjuk Nongñiah Taxi Sor bad Khapsor (SNTSK) ha ryngkat ki bor pulit ka Pynursla ha ka 08 Tarik u Nailur 2025, ki la leit ban talasi ïa ki kali shimet kiba wan kamai ha ki thaiñ Nongkynrih.
Kane ka jingtalasi ka Synjuk bad ki bor pulit kadei hadien ba ki la ïoh ka jingujor na ki nongkamai taxi kiba na kitei ki thaiñ, ba ki la shem jynjar bad duh kamai mynta namar ba la bun palat ki kali shimet ba wan kamai.
Kumta da ka jingsngewkhia mar mar ki nongïalam bad ki dkhot ka synjuk ki la leit ban ap ha shilynter ka surok ban talasi ïa ki kali shimet kiba kamai.
Haba kren sha ki lad pathai khubor u Bah James Dohkrud, Organizing Secretary u la ong ba ha kane ka jingtalasi ka Synjuk, la lap ïa shibun ki kali shimet kiba kamai hynrei bun pat kiba la aidaw ba ki wan shim dawai ïa ki khun bad ki wan donkam da ki kali lajong ym pat ban kamai. U la ong ba bunsien ka ktah ïa ki kali kamai kiba dei hok ban kamai lada ki kali shimet ki wan ban kamai namar ki nongkamai kali ki lah siew ïa ka khajna sha ka sorkar jylla, hynrei bunsien pat ha kine ki thaiñ ki kamai ki kali shimet.
Shuh shuh u la ong ruh ba kane kadei ka sien ba nyngkong ban talasi bad kin sa nangïaid biang nangne shakhmat ban talasi.
Nalorkata ka synjuk ka la maham jur ïa ki kali shimet ba lada kin lap biang sa shisien ba ki kamai, kin sa shim da kiwei pat ki sienjam.
