Shillong, Nailur 08
U Myntri Rangbah ka Jylla, u Conrad K. Sangma ha ka Lah Sngi U Blei u la wanrah ïa ka Meghalaya State Language (Amendment) Bill, 2025.
Haba wanrah ïa ka ‘Statement of Object and Reasons’ ha ka sngi nyngkong jong ka Dorbar Synrai, u Sangma u la ong ba ka Jylla Meghalaya ka la ïoh sa ïa kawei ka distrik thymmai, ka Eastern West Khasi Hills.
Ki jaidbynriew Khasi kiba don ha Eastern West Khasi Hills distrik ki pyndonkam ïa ka ktien Khasi. Kumta ka long kaba donkam ban pynkylla ïa ka bynta kaba 4 jong ka Meghalaya State Language Act, 2005 khnang ban pynrung ïa kane ka distrik thymmai ba la kdew haneng ha katei ka kyndon ba la kdew.
U la ong ba namarba ka Ïingdorbar Thawaiñ jong ka Jylla kam shym la shong Dorbar, u Lat ka Jylla u la pynbna ïa ka Meghalaya State Language (Amendment) Ordinance, 2025 kaba la wanrah jingkylla ha ka ‘Section 4’ jong ka Meghalaya State Language Act, 2005 hapoh ka Article 213 (1) jong ka Riti Synshar ka Ri.
“Namarkata, ïa kane ka ‘Ordinance’ ba la kdew haneng mynta la donkam ban bujli noh da ka ‘Bill’, kata, ka Meghalaya State Language (Amendment) Bill, 2025. Namarkata kane ka ‘Bill’,” u la bynrap.
