Shillong, Nailur 08
Kawei ka jingjia kaba sngewshyrkhei ha kaba u wei u samla ba la tip kyrteng u Bunsiewdor Nongrang, 26 snem ka rta na ka Shnong Mawlyntriang, Eastern West Khasi Hills District, u la shah ot na ki bynta jong u Pdot (Ryndang) ha ki runar ki bym lah ban tip ne ithuh kyrteng.
Kane ka jingjia shah ot Pdot u tei u samla kadei myn ha ka 06 u Nailur 2025.
Haba buddien halor kane ka khubor na ka liang u Nongsaiñ Hima u la ïoh ban ïakren lyngba ka phone bad u Pakhynnah jong u tei u samla ha kaba u la ïathuh ba ha ka step phyrngap jong ka 06 tarik u Nailur 2025, ha ki por 3 baje tam eiei, u ne u samla u la shah ot na u pdot ha ki runar.
U la ïathuh ruh ba ha kata ka por ba u shah ot, u la leit ban tied jingkhang sha ka ïing jong ki bahaïing hasem ha ryngkat ka jingphlei snam kaba jur bad hadien kata mar mar ki la pynkit noh ïa u sha CHC Nongkhlaw bad namar ka jingjur ka jingshitom la pynkit noh sha Nazareth Hospital, Shillong.
Katkum ka jingïathuh u Pakhynnah, u tei u samla u la leit sha ïing ba khlad ka meikha jong u hi bad ka la jia pat ka jingshah ot ryndang ha ka ïing kaba u dangshna kaba don ha dong nong Sohïong jong ka shnong Mawlyntriang.
U la ong ruh ba ha katei ka miet ba jia kane ka jingshah ot pdot u Bunsiewdor ka la long kumba ïuh tdong bseiñ bad baroh ki bahaïing hasem ki la kulmar shiphang namar ka jingjur ka jingphlei snam na ki bynta jong u ryndang.
“Haduh mynta ki pulit kim pat lapdien satia ïa kitei ki runar kiba leh ïa kane ka kam” la ong u Pakhynnah.
Shuh shuh u la ong ba “ngi suba ba jia katei ka jingjia shah ot pdot, ka lah ban dei ba ki ïa dih ïa bam namar lada kam dei kumta kumno hi kan leit jia kumne.”
Haba kylli u la ong “Kane ka jingshah ot ka lah ban dei beit da ka tari namar lada jia ba u shah ot da ka wait kaba heh u lah ban ïap hajuh bad dkut syndon”. U la ong ruh ba na ka liang ki bahaïing hasem ki la ujor ejahar halor kane ka jingjia.
“Ngi ki bahaïing hasem baroh ngi kwah ba ki bor pulit lada ki lap ïa kine ki runar kidei ban leh da kaba tyngeh, namar ngi sngewtieng ba kadei ka kam kaba shyrkhei kaba sang bad kaba sngewtriem haduh katta-katta” la bynrap shuh shuh u Pakhynnah.
U la ïathuh ba mynta u samla Bunsiewdor u la kham khlaiñ bad ïoh bor hadien ba la ïoh ïa ka jingsumar.
