New Delhi, Risaw 03
Ka skhim shna tiar ilektrik ka la ïoh ïa ka jingïashim bynta shit-rhem na ki nongïalam jong ki karkhana hapoh ka ri bad nabar ri.
Kane ka pyni ïa ka jingkiew kyrdan jong ka India ha ka pyrthei bad ka jingshaniah kaba nang kiew jong ki karkhana hapoh ka ri, kynthup ïa ki MSME, kiba la pyni ïa ka jingthrang ban pynlong ïa ka ri kaba lah ban kyrshan dalade ha ka kam shna tiar ilektrik.
La antad ba kane ka skhim kan plie 1,42,000 tylli ki kam kaba long palat ïa ka thong kaba 91,600 bad kham bun shah kiwei ki kam kiba ïadei bad kane, kaba pyni ïa ka lad ha ka jingïoh kam kaba heh.
Haba pynpaw ka jingkmen halor ka jingïashim bynta shit-rhem, u Myntri Sorkar Pdeng, u Ashwini Vaishnaw u la kyntu ïa ki Jylla ban shim ïa kane ka kabu ksiar bad ban thaw ïa ka rukom treikam kaba biang na ka bynta ban shna ïa ki tiar ilektronik ha ki thaiñ jong ki.
Haba ai jingkren ha ka jingïakynduh bad ki nongthoh khubor ha Electronics Niketan, New Delhi, u la ban jur ba ka kam shna tiar ilektronik ka pynmih ïa ki lad ïoh kam kiba kongsan na ka bynta ki samla.
Kane ka skhim, kaba la mynjur da ka Kynhun Myntri ha ka 1 tarik Jymmang, 2025 da ka jingpynlut pisa kaba T. 22,919 klur, ka la pdiang 249 tylli ki aplikeshon ryngkat ka jingkular ban bei tyngka kaba la khmih lynti ban long T.1,15,351 klur.
Ka jingïashim bynta ka long jan arshah ïa kaba la thmu ban siew T.59,350 klur hapoh kane ka skhim. Ka jingantad ba ka jingpynmih ïa ki tiar ilektrik hapoh kane ka skhim ha ki hynriew snem ban wan kan long kumba T. 10,34,700 klur.
Ka jingïashim bynta ka long 2.2 sien ïa ka jingthmu ba la buh thong, T. 4,56,000 klur ka jingpynmih tiar hapoh kane ka skhim.
Ka jingïashim bynta kaba khraw kan pynkylla ruh sha ka jingïoh kam shuh jong ki briew jong ka ri. La plie ïa ka por ban aplai na ka bynta ka samoi ba nyngkong kaba 3 bnai, kaba sdang naduh ka 1 tarik u Jymmang 2025, bad hadien kata la pynjlan haduh ka 30 tarik u Nailur 2025.
Na ka liang u Vaishnaw, u la ban jur ba ka jingpyntreikam kaba jop ïa ka skhim ECMS kan kyntiew ïa ka ri ban pynurlong ïa ka jingthmu jong u Myntri Rangbahduh ba don burom ban seng ïa ka rukom shna tiar hapoh ka ri kaba shongdor $500 ‘billion’ shuwa u snem 2030-31.
Da kaba tei halor ka bor ba la mih na ki skhim kum ka EMC, SPECS bad ka skhim Production Linked Incentive (PLI) na ka bynta ki ‘mobile phone’ bad ki tiar IT, ka ECMS ka pyni ïa ka jingkiew sted jong ka jingthmu ba kongsan jong ka Sorkar.
U la ong ba kawei-pa-kawei ka skhim kaba bud ka la pynkhlaiñ ïa ka rukom shna tiar ilektrik jong ka India, bad ka ECMS mynta ka khreh ban pyndep ïa ka jingpynïasoh ïa ka jingkyntiew ïa ki kam kaba lah ban kyntiew ïa ka India kum ka jaka shna tiar kaba pura ha ka pyrthei.
Kumjuh, u Secretary ka tnad Electronics and Information Technology, u S. Krishnan u la pynpaw ba ka jingmut ba kongsan ka long ban kyntiew ïa ki kam shna mar ilektrik ha India bad ban pyntikna ba ka jingkyntiew kam ha ka ri ka kiew bha. Hadien kata ka jingpynïasoh bad ki kam pynbiang mar jong ka pyrthei kan long ka bynta kaba kongsan.
