Shillong, Risaw 03
U Myntri Sorkar ba peit ïa ka tnad ka rep ka riang jong ka Sorkar Jylla u Timothy D Shira ha ka 03 tarik u Risaw 2025, u la plie paidbah ïa ka Online Registration Membership Form jong ka National People Farmers Front (NPFF).
Kane kadei kum shi bynta ban kyntiew ne pynbun ïa ka jingdon ki nongrep hapoh ka kynhun.
Ïa kane u Timothy D Shira u la plie paidbah ha ka jingïalang jong ka NPFF State Executive Committee, kaba la pynlong ha Conference Hall ha ka Ophis ka NPP, ha Bivar Road Polo Hills, Shillong.
Kane kadei ka sien ba nyngkongeh eh, ba ki President jong ka National People Farmers Front (NPFF), na man la ka district kin ïoh ban ïa kynduh mar khmat bad u Myntri Sorkar bad ruh ban ïoh pynsngew sha u, halor ka jingeh ba ki paidbah nongrep na man la ki district ki shem bad ïa kynduh.
Ki District President jong ka NPFF kiba la poi sha kane ka jingïalang ki kynthup naduh na Ri Lum Garo, Khasi bad ruh na Ri Lum Jaiñtia.
Haba kren ha kane ka sngi na ka liang u Timothy D Shira uba long kum u Kongsan u la pynpaw ïa ka jingsngewnguh kaba khraw ba u la ïoh ïa ka lad ban ïa kynduh mar khmat bad ki nongkitkam jong ka NPFF kiba la wan na kylleng ki district jong ka Jylla Meghalaya.
“Kum u Myntri Sorkar, nga tip bha ïa ki mat bad ki jingeh jong ki nongrep bad ka tnad ka rep ka riang kadei ka bynta kaba heh bha bad shibun bah ba ki nongrep ki hap ban kynduh ïa ki jingeh” la ong u Timothy.
U Timothy u la ong ruh ba wat lada mynta u la dei u Myntri Sorkar, hynrei u la long teng ruh u nongrep bad u don ka jingtip ba bniah bha ha kaba ïadei bad ka kam rep kam riang, bad u la pynpaw ka jingbynñiaw halor ka jingïap tram jong u kwai bad kiwei-kiwei ki mar-rep.
U la batai bniah bha shaphang ka jingïadei bad ki nongrep, ha kaba ïadei bad ka rukom thung dieng kwai ba donkam katno ka jingjylliew, khnang ba un soh bha bad kumno ruh ban ai dawai ban lait shah bam khñiang ki mar-rep bad kiwei-kiwei de.
Hadien ba u la dep ban ai ia ki symboh pyrkhat u la kyntu ïa ki District President bad ruh ïa ki nongkit kam ha ki Blok bapher-bapher, ba kin leit sha ki paidbah nongrep ne ki grassroots ba kin pynshai bad pynsngewthuh ha kaba ïadei bad ka rep ka riang bad u la kyntu ruh ïa ki ban pynsngewthuh ïa ki paidbah nongrep ban pynrung kyrteng ïalade sha ka NPP Farmers Front.
Na ka liang u Chairman ka NPFF pat, u Bah Himalaya M Shangpliang u la ong ba ki nongkitkam ka NPFF naduh ki District President bad ki nongïalam na ki Blok ki long kiba donbok ba kin ïoh ïa kynduh ïa u Myntri Sorkar ba peit ïa ka tnad ka rep ka riang, namar ba u dei uba la shemphang bha ha ka kam rep.
Halor ka jingthaw ïa ka NPFF, u Bah Shangpliang u la ai khublei ïa u State President jong ka National People’s Party u Bah Prestone bad kumjuh ruh ïa u Conrad K Sangma uba dei u National President kiba la ai mynsiem ban iaid sha khmat ban pyniar ïa ka rukom trei kam jong ka NPFF.
Shuh-shuh u Bah Shangpliang u la ong, “Hapoh ka ylla Meghalaya dei tang ka NPP kaba don la ka jong ka shnat trei kam ka ban peit kyrpang ïa ki nongrep, katba kiwei-kiwei ki seng saiñ pyrthei kim ju don.”
Ha kaba ïadei bad kane ka Online Registration Membership Form, u Bah Shangpliang u la ïathuh ba ki nongrep ki ban pynrung ïalade kin dei kiba la tikna bad kiba dei hok ban ïoh.
Kumba long mynta napdeng ki 60 tylli ki Konstitwensi, ka NPFF ka lah dep ban thaw ïa ki District Committee kumba 36 tylli ki Konstitwensi, katba satang 24 tylli ki dang sah ïa kaba yn pyndep noh ïa kine kiba sah hapoh mynta u bnai Risaw.
Hadien ba la kut ka samoi ha ka por mynstep la sdang biang ka bynta kaba ar, bad ha kane ka bynta kaba ar ki District President na ki District bapher-bapher ki la ïoh ïa ka lad ban pynsngew sha u Myntri Sorkar ïa ki jingeh ba ki paidbah ha man la ki District ki ïa kynduh jingeh ha kaba ïadei bad ka kam rep kam riang.
