Nongstoiñ, Risaw 03
Ha ka step jong ka 3 tarik mynta u bnai, uwei u mrad khlaw uba la tip ha ka ktien nongwei kum u ‘Slow Loris’, uba dei ruh u mrad uba la jan duh jait, u la wan poi kulmar ha kawei ka ïing briew kaba don ha ka shnong Mawïong Lumsyntiew West Khasi Hills ha kaba u la rung shapoh ka ïing sah jong u Bah Triphul Nongsiej bad ka Kong Skola Ïawphniaw.
Shuh-shuh la ong ruh haba kitei ki trai jong katei ka ïing kila ïohsngew ïa ka jingpah sha ki bynta kiba shajrong jong ka tnum ïing bad dei ha ka por 4 baje mynstep, ki la ïohi pynban ïa utei u mrad ba u la rung shapoh ïing.
Kitei ki trai ïing ki la ong ba kim shym la tip ne ïohi satia naei u wan poi utei u mrad hynrei ki shu ïohi ba u la don hapoh ïing, kumta da ka jingtieng ki la pyrshang ban kem bad ban ïoh set ïa utei u mrad hynrei kim lah bad dei tad ynda ki la pyndokam ban kem da ka Tongksong tong doh kin sa lah ban kem noh ïa u.
Kham hadien la ïoh ban aiti noh ïa utei u mrad khlaw sha ki nongtrei ka tnad ‘Wildlife’.
