Jowai, Risaw 03
Ka Dorbar shnong Loomkyrwïang ka la pynkup burom ïa u MLA ka South Shillong, Bah Sanbor Shullai hadien ba u la shah jied ban shimti kum u Myntri ba thymmai ha ka sorkar synrop jong ka Meghalaya Democratic Alliance ban peit ïa ka tnad Animal Husbandry and Veterinary, Arts and Culture, Printing and Stationary bad ka tnad Legal and Metrology ka Sorkar Meghalaya.
Ïa ka jingïalang pynkup burom la pynlong ha Iungwalieh ka Dorbar shnong ha ka 03 tarik Risaw ha ka jingïadonlang ki nongshong shnong nalor kiwei de ki riew rangbah na kiwei ki dong ki shnong.
La pynkup burom ïa u Bah Sanbor Shullai da ka jaiñ Spong bad tiar sah jingkynmaw ba la pyndep da u rangbah shnong Loomkyrwïang, Bah Lammat-o Laloo bad Adviser Bah Hamewan Laloo.
U Rangbah shnong, Bah Lammat-O Laloo ula ong kum ka shnong ka dap da ka jingkmen haba u khun ka shnong ula shah jied ban shimti ïa ka shuki Myntri Sorkar ka Jylla.
Ha ka jingkren u Bah Sanbor Shullai ula ong ba ma u udei u briew kumba ong ka ktien, ‘Work more talk less’ ne pynduna ka ktien khambun ka kam, ym kum kiwei pat ki nongïalam ki pynjur tang ka ktien ha ki jaka paidbah katba ha madan pat, ka kam ym ler.
Haba ïadei bad ka jingdawa jong ka Dorbar shnong na ka bynta ban pynbiang Sound Proof ha Iungwalieh kaba kot 38 lak tyngka, na ka liang u Bah Sanbor Shullai ula ong kum u MLA na kawei ka Constituency kam long kaba suk ïa u ban pynïoh jingïarap sha kawei pat ka Constituency, hynrei wat la katta un pyrshang ban ïakren bad u MLA ka Jowai Constituency ryngkat ka tnad ban leh ïa kaba donkam.
Ïa ka jingïalang la pynïaid da u symbud Rangbah shnong, Bah Daioolang Pakma, bad la ïoh ka jingnguh Blei na u Sophilos Lywait dkhot EC, bad la pynwai ïa ka jingïalang da ki kyntien khublei na u Assistant General Secretary, Bah Tremiki Lywait.
