Jowai, Risaw 05
U Rev. Fr. Hilarius-Lamare, u Parish Priest ka Cathedral Parish Jowai, u la khlad noh na kane ka pyrthei bad leit phai sha U Blei ha ka step jong ka 5 tarik Risaw 2025 ha ka rta kaba 73 snem.
Ïa u Fr. Hilarius la kha ha ka 1 tarik Risaw 1952 bad la kyntang Lyngdoh ïa u ha ka 16 tarik Kyllalyngkot 1983.
U Phadar Hilarius u la kem pang ha ka 18 tarik u Jylliew, 2025 bad la pynkit sha Woodland Hospital, Sabahmuswang hynrei hadien ba ki doctor ki la pyntikna ba ka dei ka jingpang Stroke, ha kato hi ka miet la rah pat sha Nazareth Hospital Shillong bad la admit ha ICU tad haduh ka jingkhlad noh ha ka step sngi U Blei ha ka por 7:50 eiei.
Ka Mass ontep kan long ha ka 7 tarik Risaw 2025 ha ka por 10:00 baje mynstep ha phyllaw ka ïingmane St. Theresa Cathedral Parish Jowai bad yn bud sa ka jingleit ontep ha u Lumkyntang ka Balang Katholik Parish Jowai.
Ka jingkhlad noh jong u Phadar Hilarius Lamare ka long ka jingduh ka bakhraw ïa ka Jylla Niam Jowai baroh kawei.
U Phadar Hilarius u la long teng kum u Administrator ka Jylla Niam Jowai naduh u snem 2011 haduh u snem 2015. U la long u Vicar General jong ka Jowai Diocese naduh u snem 2015 haduh u bnai Nohprah 2020, ha kajuh ka por naduh u snem 2015 haduh ka sngi khlad jong u, u la long u Parish Priest ka Cathedral Parish Jowai.
U la long ruh u President jong ka Jaiñtia Hills Development Society (Social wing jong ka Jowai Diocese) naduh u snem 2011 haduh mynta.
Shuwa ba u Phadar Hilarius Lamare un wan sha ka Jowai Diocese kum u Administrator, u la trei ruh ha ka Parish Umsohlait, Mawkyrwat, Mawkhar, St. Paul Seminary Upper Shillong, Namdong Parish, Cathedral Parish Shillong, u la long u Vicar General ka Shillong Arch Diocese naduh u snem 2001 haduh 2011.
